Më 24 mars vjen premiera e një serie podcastesh që nuk flet thjesht për ekonominë e gjelbër, por e vendos atë në tryezë, me emra, shifra dhe shembuj konkretë.
Për sa kohë që tranzicioni i gjelbër është kthyer në prioritet strategjik për zhvillimin ekonomik dhe rrugëtimin europian të Shqipërisë, Business Magazine Albania, me mbështetjen e Bashkimit Evropian përmes projektit EU4GreenGen, sjell një seri prej katër episodesh që synojnë të bëjnë pikërisht këtë: ta zbresin ekonominë e gjelbër nga niveli i sloganit në nivelin e zbatimit.
Katër episode. Katër tema thelbësore. Katër hapësira dialogu ku 14 të ftuar, ekspertë, sipërmarrës, këshillues biznesi dhe përfaqësues institucionesh mbështetëse, ndajnë përvojat, sfidat dhe mundësitë reale të tranzicionit drejt një modeli më të qëndrueshëm zhvillimi.
Ekonomia qarkulluese, inovacioni i gjelbër, energjia e rinovueshme, eficienca energjetike dhe përafrimi me standardet europiane trajtohen pa retorikë të tepërt, por me fokus praktik: çfarë funksionon, ku janë boshllëqet dhe cilat instrumente financiare e bëjnë të mundur ndryshimin.
Lexo edhe: EU4GreenGen /Gonzato: Tranzicioni i gjelbër, prioritet për integrimin e Shqipërisë
Sepse ndryshimi ka edhe shifra. Plot 620 milionë euro janë investuar në Shqipëri për tranzicionin e gjelbër dhe zhvillimin e qëndrueshëm, ndërsa për rajonin e Ballkanit Perëndimor mbështetja arrin në 6 miliardë euro. Investime që kanë prekur sektorë strategjikë nga energjia dhe modernizimi i rrjetit elektrik, te menaxhimi i mbetjeve, trajtimi i ujërave të ndotura, biodiversiteti dhe mbështetja e inovacionit.
Rezultatet janë konkrete: mbi 190 mijë qytetarë kanë përfituar nga përmirësimi i menaxhimit të mbetjeve; rreth 37 mijë banorë në zonat rurale kanë fituar akses në ujë të pijshëm; 56 startup-e shqiptare janë mbështetur për të zhvilluar modele biznesi të gjelbra. Tranzicioni i gjelbër nuk është një koncept abstract, është një proces që prek jetën e përditshme dhe konkurrueshmërinë e ekonomisë.
Kjo seri podcastesh nuk ofron përgjigje të gatshme, por hap pyetje të nevojshme. A është ekonomia e gjelbër një kosto apo një avantazh? Si mund të përfitojnë bizneset shqiptare nga ky transformim? Dhe sa të përgatitur jemi për standardet që kërkon integrimi europian?
Më 24 mars, ju ftojmë të bëheni pjesë e këtij dialogu.
Një seri që shkon përtej formatit mediatik dhe propozon një mënyrë tjetër për të parë zhvillimin: më të pastër, më inteligjent dhe më konkurrues.
Që nga viti 2015 nxisim shpirtin sipërmarrës, inovacionin dhe rritjen personale duke ndikuar në zhvillimin e një mjedisi motivues dhe pozitiv tek lexuesit tanë. Mbështetja juaj na ndihmon ta vazhdojmë këtë mision.
Na Suporto
