Gjigandi I hapësirave rezidenciale me qira, AirBnB të mërkurën ka paraqitur në mënyrë konfidenciale dokumentet pranë Komisionit të Sigurimeve dhe Shkëmbimeve për një ofertë fillestare publike, duke shënuar një kthesë befasuese për një kompani, biznesi i së cilës fillimisht u shkatërrua nga pandemia koronavirus. Startup me qendër në San Francisko tha se numri i aksioneve dhe diapazoni i çmimeve për ofertën e propozuar nuk janë përcaktuar. “Oferta fillestare publike pritet të bëhet pasi Komisioni i Sigurimeve dhe Shkëmbimeve të përfundojë procesin e rishikimit, në varësi të tregut dhe kushteve të tjera,” deklaroi firma.
E themeluar 12 vjet më parë, AirBnB planifikoi prej kohësh të dilte si ofertë publike. Shefi Ekzekutiv, Brian Chesky është nën presionin e punonjësve për tu listuar këtë vit në bursë sepse shumë opsione me vlerë të aksioneve do të skadojnë. AirBnB është goditur fort nga efektet financiare të pandemisë. Chesky ka thënë se të ardhurat në vitin 2020 ka të ngjarë të jenë më pak se gjysma e të ardhurave në vitin e kaluar.
Në prill, kompania mblodhi 2 miliard dollarë borxh me një normë të leverdishme interesi — dhe me garanci për investitorët e saj që kur të aplikohej do ta vlerësonte kompaninë në 18 miliard dollarë, gati gjysma e asaj që vlerësohej në 2017. Në maj, Airbnb tha se do të pushonte 1.900 punonjës, një e katërta e forcës së saj të punës.
Pandemia fillimisht dëmtoi kërkesën për 7 milion pronat e listuara nga AirBnB, por rimëkëmbja e Airbnb ka qenë befasuese. Edhe pse njerëzit ishin të detyruar të qëndronin më shumë në shtëpi për shkak të pandemisë, ata ende bënë prenotime për shtëpi me qira. Më 8 korrik, kompania deklaroi se udhëtarët rezervuan më shumë se një milion netë qëndrime të ardhshme në listat e Airbnb në të gjithë botën, tha kompania. Ishte hera e parë që arriti në atë nivel që nga 3 mars.
