Libri “Miti i sipërmarrjes: Pse falimentojnë kaq shumë ndërmarrje të vogla dhe çfarë të bëjnë për t’ia dalë mbanë”, i autorit legjendar amerikan, Majkëll E. Gërbër (Michael E. Gerber), vjen i botuar në gjuhën shqipe nga shtëpia botuese “Pema”, nën përkthimin e kujdesshëm dhe të natyrshëm të përkthyesit M.Sc. Jonis Y. Buzi. Gërbëri njihet në perëndim kryesisht për këtë libër të famshëm, i cili ka ndihmuar shumë pronarë ndërmarrjesh të vogla që të arrijnë sukses financiar dhe të bëjnë një jetë më të kënaqshme.
Ky është libri i parë i këtij autori që vjen për lexuesin shqiptar.
“Në libër trajtohet mënyra se si duhen drejtuar bizneset e vogla me qëllim që vetë biznesi të kthehet në produkt. Modeli kryesor të cilit i referohet autori është ai i “MekDonaldsit”, i cili konsiderohet si biznesi i vogël më i suksesshëm në botë. Është njëri prej librave që duhet lexuar nga kushdo që ka ndërmarrje ose biznes të vogël dhe që dëshiron t’ia dalë mbanë”, thotë Buzi.
Për sa i takon përmbajtjes, ajo që e bën të veçantë këtë libër është koncepti i biznesit si instrument nëpërmjet të cilit manifestojmë ekzistencën tonë në botë. Ky konceptim, në thelb, përbën dallimin midis ndërmarrjeve të suksesshme dhe atyre që falimentojnë.
Në libër jepet filozofia e ndërmarrjes dhe parimet bazë të saj, të shprehura me një gjuhë të thjeshtë e të kuptueshme.
I pyetur për atë se çfarë e dallon këtë libër nga shumica e librave të përkthyer sot në treg, përkthyesi Buzi thotë: “Në aspektin e përkthimit, kam vënë shënime shpjeguese aty ku e kam parë të përshtatshme për t’ia bërë lexuesit më të lehtë kuptimin e librit. Emrat e huaj i kam zëvendësuar me emra shqip, për ta bërë librin më të ngrohtë e më të këndshëm. Jam munduar të mënjanoj sa më shumë fjalitë më sintaksë të huaj, të cilat, për fat të keq, kanë pllakosur shumë përkthime. Aty ku munda, kam përdorur fjalë shqipe në vend të fjalëve të huaja. Njohuritë gjuhësore i kam gërshetuar me ato akademike për të garantuar saktësi sa më të madhe terminologjike. Rezultati i gjithë kësaj pune është se teksti rrjedh këndshëm sikur autori të ishte shqiptar.”
“Siç kam bërë në libra të tjerë, edhe në këtë libër qëllimi im ka qenë që t’u jap lexuesve një vepër për të cilën ia vlen të investojnë kohë dhe para. Se sa ia kam dalë, këtë le ta thonë ata”, shtoi përkthyesi Jonis Y. Buzi.
Që nga viti 2015 nxisim shpirtin sipërmarrës, inovacionin dhe rritjen personale duke ndikuar në zhvillimin e një mjedisi motivues dhe pozitiv tek lexuesit tanë. Mbështetja juaj na ndihmon ta vazhdojmë këtë mision.
