Investimet online, nga mashtrimi tek e vërteta: Si të dallosh realitetin nga iluzioni

Nga Endrit Çela, eskpert i tregjeve, Partner dhe Menaxher Fondesh në AMF Capital AG

Premtimet e tipit “Ktheji 1.000 euro në 50.000 brenda dy javësh” janë bërë thuajse të zakonshme në rrjetet sociale. Në YouTube, TikTok apo Instagram të dalin para video me tituj të bujshëm, njerëz me gjeste të ekzagjeruara, që të ftojnë të klikosh. Këta persona përdorin çdo truk psikologjik për të të bindur se investimi është i lehtë, i shpejtë dhe pa rrezik.

Por realiteti është shumë më kompleks dhe pikërisht për këtë arsye ky artikull ka për qëllim të ndajë me lexuesin disa reflektime, këshilla dhe paralajmërime për të shmangur gabimet më të zakonshme kur bëhet fjalë për investimet online.

Pse sot të gjithë mendojnë se mund të investojnë vetë

Jetojmë në një kohë kur investimi është bërë më i aksesueshëm se kurrë më parë. Nuk ka më nevojë të shkosh në një bankë apo të kalosh nëpër procedura të ndërlikuara. Brenda një dite, nga telefoni yt, mund të hapësh një llogari investimi dhe të fillosh të blesh aksione apo kriptomonedha.

Kjo lehtësi krijon një iluzion të rremë: sikur gjithçka është e thjeshtë dhe mund të bëhet nga kushdo. Për më tepër, në rrjete sociale, ndjekim çdo ditë qindra “influencer” apo më saktë “finfluencer” që flasin me bindje për aksione dhe strategji që, sipas tyre, garantojnë fitim. Por shumica prej tyre nuk janë as të licencuar, as të kontrolluar, dhe shpesh nuk kanë asnjë përvojë profesionale në fushën e investimeve. Ata janë tregtarë të vëmendjes dhe mjeshtra të marketingut, por kjo nuk i bën ekspertë të financave.