Hetem Ramadani sipërmarrësi meditues në Startup Grind Tirana më 12 Mars

Pasi iu bë e pamundur jeta e puna në Kosovë, Hetem Ramadanit iu desh të largohej nga vendi, duke zgjedhur të jetojë e punojë në Slloveni. Një vend ku nuk kishte miq e të afërm, por që mund të punonte, e duhej të bënte një emër të mirë për Kosovën. Kështu është shprehur në një nga intervistat e tij, kur është pyetur për suksesin e biznesit të tij në Slloveni. Atje themeloi kompaninë tregtare të naftës “Salbatring International”, e specializuar në tregtimin e derivateve të naftës.

Në vitin 2008, “Salbatring” filloi shitjet e drejtpërdrejta tek klienti kryesor i saj, “INA” i Kroacisë. Të njëjtin vit, qarkullimi në Salbatring u rrit nga 60 milionë euro në 2007 në 611 milionë euro, pavarësisht se kompania kishte vetëm 14 punonjës. Ramadani ka arritur të jetë personi i shtatë më i pasur në Slloveni, me mjete të vlerësuara mbi 68 milionë euro. Jo pa probleme në tregun ndërkombëtar, ku më të mëdhatë i pati si pasojë e problemeve të kompanisë që furnizonte, Ramadani, ka investuar në pasuri të paluajtshme. I martuar dy herë, Hetem Ramadani, ka jetuar më vonë në Dubai.

Inxhinier në profesion, jeta e tij dhe shumë personave rreth tij ka ndryshuar ndjeshëm me thellimin e studimeve të tij në mjekësi, efektet e meditimit dhe ushqimit të shëndetshëm.

Krahas meditimit prej më shumë se 30 vjetësh dhe studimeve në mjekësi ai sot hedh poshtë shumë teori të mjekësisë konvencionale. Së fundi ka publikuar librin “Shëndeti dhe suksesi nëpërmjet meditimit”, ku sjell prova sesi arriti të shëronte veten pa asnjë lloj ndërhyrjeje dhe trajtimi me ilaçe, pas një aksidenti në ski, ku theu kockën e legenit.

Lexoni : Hetem Ramadani: “Të gjithë kemi mundësi të jetojmë 140 vjet”

Sipërmarrës dhe autori i librit, Hetem Ramadani do të jetë i ftuar i Startup Grind në Tiranë më 12 mars. Një këndvështrim ndryshe për cilësinë e shëndetit tonë.

Frymëzohu me Hetem Ramadanin në Startup Grind Tirana