Google DeepMind ka lançuar një model të avancuar të inteligjencës artificiale (AI) që krijon karta jashtëzakonisht të detajuara të Tokës, duke ndihmuar shkencëtarët të kuptojnë ndryshimet mjedisore në kohë pothuajse reale. Satelitët që rrotullohen rreth Tokës mbledhin imazhe dhe matje të tokës, pyjeve, qyteteve dhe zonave bregdetare, por shpesh këto të dhëna vijnë nga burime të ndryshme dhe bashkimi i tyre në një pamje të vetme është i vështirë.
Modeli AlphaEarth Foundations i Google DeepMind funksionon si një “satelit virtual” që mund të krijojë harta në çdo vend dhe çdo kohë, sipas Christopher Brown, inxhinier kërkimi në DeepMind. Sistemi kombinon triliona imazhe nga dhjetëra burime publike si imazhet satelitore, skanerat radar, hartat 3D me lazer dhe simulimet klimatike, duke përfshirë të gjitha sipërfaqet tokësore dhe ujërat bregdetarë të planetit tonë.
Google thekson se ky model mund të japë të dhëna të sakta për ekosistemet deri në një sipërfaqe prej 10 metrash katrorë, duke zënë shumë më pak hapësirë ruajtëse sesa sistemet e tjera të ngjashme të AI-së, gjë që e bën më të lehtë analizën në shkallë të gjerë. Në testimet fillestare me të dhëna nga viti 2017 deri në 2024, AlphaEarth Foundations ka tejkaluar modelet e tjera AI në njohjen e përdorimit të tokës dhe vlerësimin e vetive të sipërfaqes, me një gabim mesatar 24% më të ulët.
Lexo edhe: Nvidia dhe AMD do t’i paguajnë qeverisë amerikane 15% të të ardhurave nga shitjet në Kinë
Qëllimi është të ndihmojë studiuesit në monitorimin e ndryshimeve mjedisore për sigurinë ushqimore, shpyllëzimin, zgjerimin urban dhe menaxhimin e burimeve ujore. Kjo vjen si pjesë e një tendence në shkencën mjedisore ku AI përpunon në mënyrë efektive vëzhgimet e vazhdueshme satelitore në mjete praktike për studimin e Tokës.
Për shembull, në vitin 2020, studiues të NASA-s dhe Universitetit të Kopenhagës përdorën AI për të hartuar mbi 1.8 miliardë kurora pemësh në rajonet Sahel dhe Sahara në Afrikën Perëndimore një detyrë që pa AI do të kërkonte vite me punë manuale nga miliona njerëz.
Modeli është testuar tashmë nga mbi 50 organizata në mbarë botën për monitorim ekosistemi dhe planifikim urban. Një iniciativë mjedisore në Brazil, MapBiomas, përdor të dhënat e AlphaEarth Foundations për të kuptuar më mirë ndryshimet bujqësore dhe mjedisore, përfshirë pyjet e Amazonës. Tasso Azevedo, themelues i MapBiomas, vlerëson se këto të dhëna u dhanë mundësi për harta më të sakta dhe më të shpejta, diçka që më parë nuk ishte e mundur.
Google po i bën të disponueshme këto të dhëna përmes platformës Google Earth Engine për të nxitur kërkime të mëtejshme dhe përdorim më të gjerë.
Që nga viti 2015 nxisim shpirtin sipërmarrës, inovacionin dhe rritjen personale duke ndikuar në zhvillimin e një mjedisi motivues dhe pozitiv tek lexuesit tanë. Mbështetja juaj na ndihmon ta vazhdojmë këtë mision.
