Nga samiti i Gjermanisë, lideret e G7-ës, do të bien dakord për vendosjen e një kufiri të çmimit të naftës ruse për të limituar të ardhurat e Moskës nga shitja e hidrokarbureve, si elementi kryesor i sanksioneve të reja ndaj Rusisë për pushtimin e saj të paprovokuar të Ukrainës. Njoftimin e bëri Shtëpia e Bardhë, që sqaroi se masat e reja do të përfshijnë ndër të tjera edhe fushën e prodhimeve ushtarake dhe furnizimin e Moskës.
Qëllimi është që Rusisë t`i bllokohet qasja tek teknologjia e re ushtarake. Është vendosur po ashtu që të shtohen doganat ndaj prodhimeve ruse dhe që këto të ardhura të ndahen për të ndihmuar Ukrainën. Disa media dhanë detaje sesi do të funksionojë kufiri i çmimeve që po përcaktohet gjatë samitit dy ditor. “Objektivat e dyfishtë të liderëve të G7-s janë synimi i drejtpërdrejtë i të ardhurave të presidentit rus Vladimir Putin, veçanërisht ato të gjeneruara përmes energjisë, por gjithashtu të minimizojnë pasojat dhe ndikimin në ekonomitë e G7 dhe pjesën tjetër të botës,” tha një zyrtar amerikan për agjencinë e lajmeve Reuters.
Grupi i vendeve të pasura perëndimore po përpiqet të shtojë trysninë mbi Moskën, duke minimizuar në të njëjtën kohë dëmet që mund t`i vijnë nga kjo lëvizje vetë ekonomive të tyre. Çmimet e naftës janë rritur ndjeshëm që prej fillimit të agresionit rus në Ukrainë, teksa sanksionet e vendosura mbi të kufizojnë eksportet ruse të lëndëve të para. Debate ka pasur ndërkohë rreth ndalimit të importit të arit nga Rusia. SHBA e kanë mbështetur këtë propozim, por disa vende të tjera, jo. Në grupin G7 bëjnë pjesë SHBA, Gjermania, Franca, Kanadaja, Britania e Madhe, Japonia dhe Italia. Ndërsa në samit marrin pjesë edhe përfaqësuesit e Bashkimit Europian.
Që nga viti 2015 nxisim shpirtin sipërmarrës, inovacionin dhe rritjen personale duke ndikuar në zhvillimin e një mjedisi motivues dhe pozitiv tek lexuesit tanë. Kjo punë që e bëjmë me shumë dashuri nuk ka të paguar. Ne jemi platforma e vetme e cila promovon modelin pozitiv të sipërmarrjes së lirë. Përmes kësaj platforme mbështesim edukimin gjatë gjithë jetës si mjet për zhvillimin personal dhe profesional të brezave. Kontributi juaj do të na ndihmojë në vazhdimin e këtij misioni në gjithë trevat shqipfolëse.
Mund të kontribuoni KETU. Falemnderit.
