Farmacistja që po zhvillon linjën e saj të kozmetikës

Keni dëgjuar për vajzën nga Peja, e cila prej kohësh po zhvilon një biznes në Shqipëri?! Ju prezantojmë me Rona Nushin, farmacisten e apasionuar pas kozmetikës dhe biznesit. U diplomua tek Zonja e Këshillit të Mirë në bashkëpunim me Universitetin e Milanos, ku zhvilloi praktikën dhe temën e diplomës. Sipërmarrjen dhe mjekësinë i ka të ushqyera nga prindërit e saj, të cilët janë sipërmarrës dhe njëkohësisht merren me mjekësi.

Ndërthuarja e dy pasioneve e ka bërë atë të krijojë markën e saj të produkteve kozmetike Bees&Trees, markë e cila operon në Shqipëri, Kosovë dhe shitje online jashtë vendit. Një markë  kjo tashmë e çertifikuar sipas standadeve europiane. E pyetur nga BusinessMag.al se si ka lindur ideja e krijimit të këtij binzesi Rona tregon se fillimisht krijoi një krem për qëllime personale. Interesi i madh nga shoqëria e të afërmit si dhe nxitja që i dhanë prindërit për krijimin e një biznesi, e bënë që të krijonte një biznes nën emrin Bees&Trees.

Rona ndjek vetë gjithë zinxhirin e prodhimit, që nga kërkimi i furnizuesve të lëndës së parë brenda dhe jashtë Shqipërisë, amballazhimin, marketingun, e deri tek shpërndarja e produkteve të saj në Shqipëri e Kosovë. Pas regjistrimit të markës dhe produkteve sipas standadeve të kërkuara nga BE, tashmë linja prodhohet në Itali dhe Rona merret me pjesën tjetër të menaxhimit të biznesit.

Por si hyri Rona në treg me këtë produkt?

Biznesi nisi si një markë instagrami. Aty shitej si produkt.  Krijimi i një kanali në Youtube, ku ajo tregon përdorimin e kremrave ua ka bërë më të lehtë përdoruesve njohjen me produktin. Për Ronën rrjetet sociale janë forma më e lehtë e marketingut. Tashmë dyqani i saj gjendet në një nga qendrat tregtare në kryeqytet, ku tregton rreth 18 produkte, të gjitha organike. Certifikimi është një nga proceset më të vështirë, me të cilin ajo është hasur gjatë rrugëtimit të këtij biznesi. “Kam harxhuar shumë kohë dhe më ka kushtuar shumë financiarisht, por ia ka vlejtur”- shprehet ajo për BusinessMag.al.

E pyetur për planet e së ardhmes dhe për të ardhmen e Bees&Trees ajo shprehet: ”Me Bees&Trees synoj zgjerimin dhe shume shpejt do më gjeni në tregje të Europës dhe në të ardhmen pse jo me biznese të reja”. Rona zgjedh t’i motivojë të rinjtë kështu: ”Guxoni të hidhni hapin e pare. Në një vend ku shumë gjëra mungojnë, mundësitë janë të shumta”.