Universiteti Metropolitan Tirana organizon edicionin e tretë të “Start Up City”, një iniciativë unike në vend për fuqizimin dhe aplikimin e ideve të biznesit Start Up në Shqipëri.
“Start Up City” është vendi ku studentët dhe të rinjtë mund t’i zhvillojnë idetë e tyre të biznesit, duke i prezantuar përballë një jurie prestigjioze. Ky kompeticion synon të ndihmojë të gjithë të rinjtë novator me shpirt sipërmarrës që të realizojnë dhe prezantojnë idetë e tyre të biznesit.
Në edicionin e tij të tretë, Start-Up City vjen si bashkëpunim mes Universitetit Metropolitan Tirana, Metropolitan Incubator dhe Fakultetit të Ekonomisë, Universiteti i Tiranës.
Sesioni i parë informues zhvillohet më 15 prill, ora 15:00. Drejtori i Metropolitan Incubator, Dr. Pleurat Rexhepi do t’ju përgjigjet të gjitha dilemave mbi aplikimin në Start-Up City 3. Ky seksion mund të ndiqet online përmes linkut: https://bit.ly/3tu6fyR
Duhet nënvizuar se Universiteti Metropolitan Tirana, së bashku me Metropolitan Incubator, i krijuar 5 viteve më parë si inkubatori i parë i biznesit brenda një Universiteti, janë mbështetës të ligjit të ri për Start Up-et, i cili sipas asaj që Ministri për Sipërmarrjen, z. Eduard Shalsi theksoi në takimin me drejtuesit UMT do të bëjë të mundur krijimin e një ekosistemi që do të çlirojë energji pozitive, kreative dhe inovative të të rinjve.
Aktiviteti i Start Up City 3 do të mentorohet nga pedagogë dhe profesionistë në fusha të ndryshme, duke përzgjedhur idetë më të mira dhe duke bërë të mundur zhvillimin e tyre të mëtejshëm në treg.
Mbështetja e ofruar nga platforma e Start Up City siguron përzgjedhjen e ideve më të mira, financimin dhe suportin e vazhdueshëm deri në operimin e suksesshëm në treg, nëpërmjet Metropolitan Incubator.
Kjo iniciativë ka provuar suksesin e saj për 2 vite rresht, gjë që ka sjellë edhe mbështetjen e shtuar të sponsorave. Kështu, sponsori i ri i këtij viti është OTP Bank Albania.
Aplikimet për Start-Up City 3 janë të hapura deri më 30 prill, ndërsa eventi do të kulmojë me prezantimin final dhe aktivitetin gala, në datat 13-14 Maj 2021.
Që nga viti 2015 nxisim shpirtin sipërmarrës, inovacionin dhe rritjen personale duke ndikuar në zhvillimin e një mjedisi motivues dhe pozitiv tek lexuesit tanë. Kjo punë që e bëjmë me shumë dashuri nuk ka të paguar. Ne jemi platforma e vetme e cila promovon modelin pozitiv të sipërmarrjes së lirë. Përmes kësaj platforme mbështesim edukimin gjatë gjithë jetës si mjet për zhvillimin personal dhe profesional të brezave. Kontributi juaj do të na ndihmojë në vazhdimin e këtij misioni në gjithë trevat shqipfolëse.
Mund të kontribuoni KETU. Falemnderit.
