Çfarë mësuam nga klientët e EasyPay? Ata që ndryshuan mënyrën e të paguarit në Shqipëri

nga Jonida Këllezi, Drejtore Marketingu, EasyPay

Ndryshimi i zakoneve të pagesave nuk ndodh natyrshëm. Në Shqipëri, cash-i ka mbizotëruar për dekada. Megjithatë, adoptimi i shërbimeve dixhitale, si EasyPay, tregon se sjellja e përdoruesve mund të transformohet kur fushatat ndërtohen mbi edukim, infrastrukturë dhe komunitet.

Ne EasyPay, ky proces ka qenë i gjatë. Duke u bazuar në të dhënat reale që kemi për klientët tanë, kemi arritur të ndërtojmë teknika dhe mesazhe konsistente, të formuluara në gjuhën e tyre. Për të krijuar fushata të suksesshme gjatë 15 viteve të aktivitetit, kemi dëgjuar klientët tanë, kemi zhvilluar produkte, shërbime dhe partneritete që përkojnë me nevojat e tyre, dhe kemi krijuar ura bashkëpunimi me aktorë të tjerë të tregut, në mënyrë që të ndërtojmë një ekosistem të plotë dhe të qëndrueshëm.

Gjatë rrugëtimit tonë në këtë treg, ku nuk kishte aktorë të tjerë si ne, ku buxhetet e marketingut ishin të kufizuara dhe ekspertiza ishte e pakët — kemi mësuar disa leksione kyçe. Më poshtë i përmbledhim disa nga këto mësime, të cilat mund të shërbejnë si udhërrëfyes për çdo fushatë që synon të ndryshojë zakonet e përdoruesve.

Edukimi gradual

Adoptimi i teknologjisë nuk ndodh brenda një dite. Teorisht, ndryshimi i sjelljes së konsumatorit kërkon një qasje të strukturuar që bazohet në “behavioral change frameworks”, të cilat janë modele teorike që shpjegojnë si dhe pse njerëzit ndryshojnë zakonet dhe sjelljet e tyre me kalimin e kohës; ai cili përshkruan fazat e ndryshimit të sjelljes nga mosvetëdijësimi, tek përgatitja, veprimi dhe ruajtja e sjelljes së re. Në praktikë, këto modele / framework-e përdoren për të krijuar mesazhe të përsëritura dhe të qëndrueshme që edukojnë përdoruesit, ndërtojnë besim dhe i ndihmojnë ata të përvetësojnë gradualisht zakonet e reja. Për një markë që synon të edukojë një audiencë kryesisht të orientuar drejt cash-it, teknikat kryesore përfshijnë tutoriale të thjeshta dhe të vizuale, udhëzime hap-pas-hapi që ilustrojnë qartë përdorimin e shërbimeve elektronike, si dhe krijimin e mesazheve që komunikojnë sigurinë dhe përfitimet e përdorimit të tyre. 

Gjatë viteve, ne në EasyPay, kemi arritur të integrojmë kanale tradicionale dhe dixhitale, duke synuar të maksimizojmë arritjen e audiencës dhe efektin e fushatave tona. Përveç mesazheve edukative, kemi organizuar edhe workshop-e dhe takime fizike, të cilat jo vetëm që krijojnë një lidhje më të drejtpërdrejtë me përdoruesit, por edhe mundësojnë marrjen e feedback-ut të drejtpërdrejtë, duke e bërë procesin e adoptimit më të qasshëm dhe më të sigurt. Kjo qasje graduale ka ndihmuar që përdoruesit e platformës EasyPay të fitojnë besim dhe të adoptojnë pagesat elektronike si një pjesë të natyrshme të zakoneve të tyre financiare.

Lexo edhe: Workshop për startupet: “Cyber Ready”, si të mbrosh biznesin tënd në botën digjitale!

Rrjeti i agjentëve dhe impakti I tyre

Agjentët EasyPay nuk janë thjesht pika pagese; ata luajnë një rol kyç në ekosistemin e pagesave dixhitale duke:

• fuqizuar bizneset lokale;
• edukuar qytetarët mbi financat;
• rritur rolin e grave dhe të rinjve në ekonominë dixhitale.

Ky kontakt i drejtpërdrejtë me komunitetin krijon adoptim të qëndrueshëm dhe efekt social të prekshëm, duke e bërë teknologjinë të pranueshme dhe të besueshme.

Duke iu referuar situatës së tregut shqiptar në vitin 2010, nisja e një biznesi me pagesa përmes telefonit nuk do të kishte suksesin e dëshiruar. Cash-i dominonte dhe përdorimi i teknologjisë dixhitale ishte i kufizuar. Për këtë arsye, modeli i biznesit duhej të pershtatej me tregun ekzistues, dhe zgjidhja ishte krijimi i një rrjeti të agjentëve fizikë, ndërsa platforma e pagesave mbetej plotësisht dixhitale. Sfida kryesore ishte edukimi i këtyre agjentëve drejt konceptit të parave dixhitale, të cilët më pas do të transferonin këtë njohuri tek klientët dhe komunitetet e tyre.

Agjentët u bënë imazhi i EasyPay: ata ishin pika e parë dhe e vetme e kontaktit me tregun dhe burimi kryesor i feedback-ut, i cili ishte mjaft i rëndësishëm për zhvillimin e shërbimeve financiare dixhitale. Nga perspektiva teorike, pikat fizike të kontaktit me konsumatorin janë thelbësore në ndërtimin e perceptimit pozitiv të markës dhe në krijimin e lidhjeve emocionale me përdoruesit, veçanërisht kur produkti është dixhital dhe audienca nuk është shumë e afërt me teknologjinë. 

Në këtë kontekst, rrjeti i agjentëve fizikë nuk ishte vetëm një kanal shërbimi; ai shërbeu si ure mes markës dhe komunitetit, duke mundësuar edukim, adoptim gradual dhe krijimin e besimit në një treg ku digitalizimi fillonte të merrte hov.

Kanale dhe përmbajtje

Menaxhimi strategjik i kanaleve është një komponent kyç i çdo fushate që synon të ndryshojë zakonet e përdoruesve. Teorisht, marketingu omnichannel nënvizon rëndësinë e integrimit të kanaleve tradicionale dhe dixhitale për të krijuar një përvojë të unifikuar për përdoruesin. Në praktikë, kjo do të thotë të përdorësh:

• Mediat sociale, për të arritur audiencën më të gjerë dhe për të krijuar mesazhin tend me përmbajtje educative sa më viral;
• Mediat tradicionale, për të ndërtuar besim dhe reputacion, veçanërisht në një treg ku konsumatorët kanë më shumë beseim ndaj formave të njohura të informacionit;
• Eventet dhe workshop-et, për edukim të drejtpërdrejtë dhe marrjen e feedback-ut të vlefshëm nga përdoruesit.

Në EasyPay, kemi kombinuar këto kanale për të maksimizuar efektin e mesazheve tona dhe për të siguruar që çdo përdorues të ketë mundësi të marrë informacionin në formatin që i përshtatet më mirë. Përmbajtja edukative është dizajnuar për të reduktuar kompleksitetin e pashmangshëm, duke shpjeguar qartë hapat për përdorim dhe përfitimet e kryerjes së pagesave me kanalet dixhitale. Kjo qasje na ka ndihmuar në ndërtimin e besimit dhe na ka lehtësuar në procesin e ndryshimit të sjelljes së përdoruesve tanë (qofshin këta biznese apo klient fundor).

Matja dhe optimizimi

Fushatat nuk përfundojnë me publikimin e tyre në kanalet e komunikimit. Ato kërkojnë një kujdes të vazhdueshëm në matjen e performances së tyre dhe në përmirësimet respective. 

Në EasyPay, skuadra e marketingut monitoron çdo kanal për të identifikuar:

• Mesazhet që arrijnë audiencën në mënyren më efektive;
• Kanalet që gjenerojnë angazhimin më të lartë të audiencave;
• Elementë / fushata / imazhe apo tekste të mundshme për përmirësim.

Kjo lejon një përshtatje të fushatave, duke garantuar që përdoruesit të marrin informacionin e duhur në kohën e duhur. Përveç analizave sasiore, marrja e feedback-ut nga workshop-et dhe kontaktet direkte me agjentët shton dimensionin cilësor, i cili siguron që strategjia të mbetet e lidhur ngushtë me nevojat reale të audiences.

Pra, ndryshimi i zakoneve të pagesave kërkon një qasje të integruar dhe holistike: njohje të përdoruesit, edukim gradual, rrjet komuniteti dhe matje të vazhdueshme të performancës. EasyPay është një rast real që tregon se pagesat dixhitale mund të zëvendësojnë gradualisht cash-in, duke sjellë një transformim ekonomik dhe social të prekshëm në Shqipëri. Dhe ne do të vazhdojmë të përmirësojmë dhe të zhvillojmë fushatat tona të komunikimit, për të siguruar që çdo përdorues të përfitojë nga avantazhet e një ekonomie të plotë dixhitale.