Inteligjenca artificiale mund të fshijë gjysmën e vendeve të punës në nivelin fillestar të punëve të bardha dhe të çojë normën e papunësisë në SHBA deri në 20%, ka paralajmëruar drejtori ekzekutiv i një prej kompanive më të rëndësishme të AI-së.
Dario Amodei, CEO i Anthropic, kompania që ka zhvilluar chatbot-in e njohur “Claude”, ka theksuar se drejtuesit dhe politikanët duhet të ndalojnë së “zbuturi të vërtetën” për valën e pushimeve nga puna që mund të ndodhë në fusha si teknologjia, financat dhe ligji — dhe të jenë të sinqertë me punëtorët për shkallën e rrezikut. “Shumica prej tyre nuk janë aspak të vetëdijshëm për atë që po vjen,” u shpreh Amodei për Axios në një intervistë të publikuar të mërkurën. “Tingëllon e pabesueshme dhe njerëzit thjesht nuk e besojnë.”
Sipas tij, kjo goditje në tregun e punës mund të ndodhë brenda 1 deri në 5 vitet e ardhshme. Nga ana tjetër, ai thotë se AI do të sjellë përfitime të mëdha për ekonominë dhe do të nxisë përparime të paprecedenta në fusha si mjekësia. “Kanceri shërohet, ekonomia rritet me 10% në vit, buxheti ekuilibrohet — dhe 20% e njerëzve mbeten pa punë,” përshkroi Amodei një nga skenarët e mundshëm. Aktualisht, niveli i papunësisë në SHBA qëndron në rreth 4.2%. Ky paralajmërim i fundit nga CEO i Anthropic vjen në një kohë kur kompania e tij garon me gjigantë të tjerë të teknologjisë si Google, Meta dhe OpenAI, për të zhvilluar inteligjencën e përgjithshme artificiale (AGI) — një formë AI-je që ka kapacitet kognitiv të ngjashëm me njeriun, ose edhe më të madh.
Lexo edhe:CEO i Nothing: Telefonat e së ardhmes do të përdorin vetëm një aplikacion me AI
Amodei, i cili më parë ka punuar në OpenAI nën drejtimin e Sam Altman, është një nga disa drejtues që kanë ngritur alarmin për trazirat që po vijnë në tregun e punës. Më herët gjatë këtij viti, CEO i Meta, Mark Zuckerberg, foli për rolin në rritje të AI-së në kompaninë e tij. “Me shumë mundësi në vitin 2025, ne në Meta, ashtu si edhe kompanitë e tjera që punojnë në këtë drejtim, do të kemi një AI që funksionon praktikisht si një inxhinier i nivelit të mesëm që mund të shkruajë kod,” tha ai në një intervistë në podcast-in “The Joe Rogan Experience”. Ndërkohë, CEO i Google, Sundar Pichai, paralajmëroi në prill të vitit 2023 se ai priste që punonjësit e dijes — si shkrimtarët, kontabilistët, arkitektët dhe inxhinierët e softuerëve — të goditen fort nga rritja e përdorimit të AI-së.
Që nga viti 2015 nxisim shpirtin sipërmarrës, inovacionin dhe rritjen personale duke ndikuar në zhvillimin e një mjedisi motivues dhe pozitiv tek lexuesit tanë. Mbështetja juaj na ndihmon ta vazhdojmë këtë mision.
Na Suporto
