Bitcoin, kriptomonedha më e madhe dhe më e shtrenjtë në botë, ka hyrë në një fazë rënieje të mprehtë, duke fshirë çdo fitim të akumuluar gjatë vitit dhe duke rënë mbi 25% nga rekordi i tetorit. Çmimi zbriti nën 92,000 dollarë për monedhë, një ndryshim që sinjalizon hyrjen e plotë në territorin e ‘bear market’, ku aktivet rrëzohen me ritme të ngjashme me goditjen e kthetrës së një ariu.
Vetëm në 24 orët e fundit, Bitcoin ra deri në 89,471 dollarë, gati 30% poshtë pikës më të lartë të arritur më pak se një muaj më parë, me një stabilizim të lehtë në tregtimin e së martës.
“Bitcoin po thellon humbjet, duke zbritur rreth 2% dhe duke u shtyrë nga frika e mbivlerësimeve në sektorin e teknologjisë dhe një ndjenjë e përgjithshme ‘risk-off’ që ka goditur tregjet globale”, shpjegon Victoria Scholar, drejtuese e investimeve në Interactive Investor.
Pavarësisht një rritjeje të fuqishme në fillim të tetorit, monedha ka humbur tani të gjitha fitimet e vitit 2025 dhe po tregtohet poshtë nivelit ku nisi janarin. Sipas Scholar, paniku aktual lidhet edhe me frikën nga një flluskë e mundshme në inteligjencën artificiale, si dhe varësia e tepruar e tregut nga gjigantët e teknologjisë, faktorë që po largojnë investitorët nga asetet spekulative.
Rënia vjen pavarësisht një klime politike relativisht pro-kripto në SHBA, një drejtuesi më pak agresiv tek SEC dhe ligjit të ri për stablecoin-et.
Lexo edhe: Bie interneti në të gjithë botën, disa website ndalojnë së funksionuari
Fuqia dhe dobësia e një monedhe të decentralizuar
Bitcoin funksionon përmes një regjistri të decentralizuar, blockchain-it, i ndarë në mijëra kompjuterë që verifikojnë e regjistrojnë çdo transaksion. Sistemi është transparent dhe i pandryshueshëm, por kjo e bën Bitcoin-in një aktiv me amplituda të mëdha, sepse çdo ndryshim i sentimentit të tregut përkthehet menjëherë në lëvizje ekstreme të çmimit.
Në një mjedis global të tensionuar dhe me norma të larta interesi, investitorët janë të parët që shkëputen nga asetet me rrezik të lartë dhe pa të ardhura siç është Bitcoin.
“Ka një nervozizëm të përgjithshëm në treg dhe Bitcoin gjendet në vijën e parë të goditjes”, nënvizon Scholar.
Që nga viti 2015 nxisim shpirtin sipërmarrës, inovacionin dhe rritjen personale duke ndikuar në zhvillimin e një mjedisi motivues dhe pozitiv tek lexuesit tanë. Kjo punë që e bëjmë me shumë dashuri nuk ka të paguar. Ne jemi platforma e vetme e cila promovon modelin pozitiv të sipërmarrjes së lirë. Përmes kësaj platforme mbështesim edukimin gjatë gjithë jetës si mjet për zhvillimin personal dhe profesional të brezave. Kontributi juaj do të na ndihmojë në vazhdimin e këtij misioni në gjithë trevat shqipfolëse.
Mund të kontribuoni KETU. Falemnderit.
