Takime me peshë të lartë priten pasditen e së hënës, në një klimë të re pasigurie për marrëdhëniet tregtare transatlantike, pasi një vendim i Gjykatës së Lartë të SHBA-së dhe kërcënimet e reja tarifore nga Uashingtoni tronditën ekuilibrat ekzistues.
Komisioneri i Tregtisë i BE-së, Maroš Šefčovič, do të takohet me ministrat e tregtisë të vendeve të G7, pasi presidenti i SHBA-së, Donald Trump, rriti presionin ndaj partnerëve tregtarë duke shpallur tarifa lineare 15% për të gjitha importet që hyjnë në tregun amerikan.
Lëvizja e Trump erdhi pasi Gjykata e Lartë e SHBA-së rrëzoi javën e kaluar disa nga tarifat globale të vendosura prej tij vitin e kaluar nga Shtëpia e Bardhë, duke goditur një nga shtyllat kryesore të politikës së tij tregtare.
Brukseli po kërkon tashmë qartësi ligjore. BE-ja është e lidhur me Uashingtonin përmes një marrëveshjeje tregtare të arritur në korrik 2025 nga presidentja e Komisionit Europian, Ursula von der Leyen, dhe Trump, e cila përcakton tarifa 15% për eksportet e BE-së drejt SHBA-së, ndërsa parashikon që blloku të ulë në zero tarifat për mallrat amerikane.
“Qartësia e plotë mbi kuptimin e këtyre zhvillimeve të reja për marrëdhënien tregtare BE-SHBA është minimumi i domosdoshëm që BE-ja të mund të bëjë një vlerësim të kthjellët dhe të vendosë për hapat e ardhshëm,” deklaroi zëvendëszëdhënësi i Komisionit, Olof Gill.
Lexo edhe: Largimi i hershëm i Lagarde, shtetet e BE-së në garë për pasardhësen e BQE-së
Parlamenti Europian në qendër të vëmendjes
Bisedimet e Šefčovič me G7 zhvillohen përpara një takimi me dyer të mbyllura të ambasadorëve të BE-së, ku do të vlerësohen pasojat e zhvillimeve të fundit në SHBA.
Disa shtete anëtare, përfshirë Francën, janë të gatshme të aktivizojnë instrumentin Anti-Koercion të BE-së, që lejon kufizime në prokurimet publike, licencat dhe të drejtat e pronësisë intelektuale, nëse konsiderohet e nevojshme për t’iu kundërpërgjigjur presioneve të jashtme.
Vëmendja po zhvendoset tani te Parlamenti Europian, i cili pritej të votonte të martën për zbatimin e marrëveshjes BE-SHBA, përfshirë uljen e tarifave për mallrat amerikane. Megjithatë, eurodeputetët do të mblidhen të hënën pasdite për të vendosur mbi të ardhmen e zbatimit të saj.
Parlamenti ka qenë ndër zërat më kritikë ndaj administratës amerikane, duke argumentuar se marrëveshja e nënshkruar verën e kaluar në Skoci nuk ka vlefshmëri të plotë.
Eurodeputeti gjerman Bernd Lange, kryetar i Komitetit për Tregtinë Ndërkombëtare në Parlament, deklaroi se do t’u kërkojë negociatorëve pezullimin e marrëveshjes. Nga ana tjetër, Zeljana Zovko, negociatore kryesore e PPE-së, grupit më të madh në Parlament mbajti një ton më të përmbajtur, duke theksuar se eurodeputetët duhet të “ruajnë qetësinë dhe të bëjnë pjesën e tyre”.
“Nuk ka nevojë t’i hedhim më shumë benzinë një zjarri që tashmë është ndezur,” u shpreh ajo.
Që nga viti 2015 nxisim shpirtin sipërmarrës, inovacionin dhe rritjen personale duke ndikuar në zhvillimin e një mjedisi motivues dhe pozitiv tek lexuesit tanë. Mbështetja juaj na ndihmon ta vazhdojmë këtë mision.
Na Suporto
