AMA dhe platforma “X” e Elon Musk bashkohen kundër urrejtjes online

Autoriteti i Mediave Audiovizive (AMA) ka nënshkruar një marrëveshje të re bashkëpunimi me platformën globale “X” , e njohur më parë si Twitter dhe aktualisht në pronësi të Elon Musk  për të ndërtuar një kanal të posaçëm komunikimi, i cili do të shërbejë për monitorimin dhe trajtimin e përmbajtjeve të papërshtatshme në gjuhën shqipe.

Kryetarja e AMA-s, znj. Armela Krasniqi, deklaroi se synimi kryesor i këtij bashkëpunimi është mbrojtja e hapësirës digjitale nga përmbajtjet që nxisin dhunë, gjuhë urrejtjeje apo cenojnë të drejtat e fëmijëve dhe grupeve të tjera të pambrojtura. Ajo nënvizoi se çdo rast i tillë do të trajtohet me veprime të menjëhershme dhe konkrete.

”Kemi vendosur bashkëpunim me platformën X për të mbikqyrur dhe ndjekur me prioritet çdo përmbajtje potencialisht të dëmshme në gjuhën shqipe, që shpërndahet në këtë platformë. Një mjedis digjital i pastër, pa dhunë, pa urrejtje dhe mbrojtja e të drejtave të fëmijëve apo komuniteteve, është prioritet për ne. Falenderuese për këtë rekord të ri bashkëpunimi me X, një nga platformat e mëdha online.” – shkruan në Facebook znj. Krasniqi.

Lexo edhe: Arsimi Digjital 2025–2030, internet të shpejtë në shkolla dhe 5500 laptopë

Kjo marrëveshje vjen në një kohë kur Elon Musk e ka përforcuar idenë e tij se përdoruesit e platformës X janë tashmë “media e re”. Sipas tij, informacioni duhet të rrjedhë drejtpërdrejt nga qytetarët, pa ndërmjetës klasik si mediat tradicionale, një ide që ka ngjallur si mbështetje, ashtu edhe kritika për mungesë kontrolli profesional e etik.

Sipas raportit të fundit të “DataReportal”, në fillim të vitit 2025, platforma X kishte një audiencë të mundshme reklamimi prej rreth 216 mijë përdoruesish në Shqipëri, që përfaqëson 7.8% të popullsisë, ndërkohë që 9.5% e të rriturve mbi 18 vjeç raportoheshin si përdorues aktivë të saj.