Në një përpjekje të guximshme për të përshpejtuar procesin e miratimit të pajisjeve mjekësore, Administrata Amerikane e Ushqimit dhe Barnave (FDA) ka zhvilluar një mjet të ri me inteligjencë artificiale – por teknologjia, ende në fazë testimi, po tregon më shumë dobësi se sa premtime.
I quajtur CDRH-GPT, ky sistem është ndërtuar për të analizuar pajisje jetike si stimuluesit kardiakë, skanerët CT dhe pompat e insulinës. Por raportimet nga NBC News zbulojnë një tablo shqetësuese: teknologjia nuk është funksionale, nuk lidhet me sistemet e brendshme të agjencisë, nuk përpunon dokumente siç duhet dhe nuk lejon pyetje nga përdoruesit.
“Kam frikë se po hidhen drejt AI-së nga dëshpërimi, përpara se teknologjia të jetë gati”, paralajmëron Arthur Caplan, një nga emrat më të njohur në etikën mjekësore në NYU Langone Medical Center.
Në fakt, CDRH-GPT nuk ka akses në internet, nuk mund të lexojë të dhëna të reja shkencore dhe ka dhënë përmbledhje të pasakta për pajisje që tashmë janë miratuar nga vetë FDA. Projektin e udhëheq Komisioneri i ri, Marty Makary, i cili ka premtuar transformimin digjital të agjencisë përmes inteligjencës artificiale, me një afat zbatimi të plotë deri më 30 qershor.
Por CDRH-GPT nuk është i vetmi mjet që FDA po eksperimenton. Një tjetër sistem, i quajtur Elsa, është tashmë në përdorim për detyra më rutinë si përmbledhja e efekteve anësore të ilaçeve. Makary e përshkruan si një sukses: “Ajo që zakonisht kërkonte tre ditë, tani bëhet në gjashtë minuta.” Megjithatë, punonjësit shprehin mosbesim për këto deklarata.
Etika dhe interesa në sfond
Ndërsa teknologjia ndesh pengesa praktike, ngriten edhe pikëpyetje serioze etike. Richard Painter, ish-këshilltar etik i Shtëpisë së Bardhë dhe profesor në Universitetin e Minnesota-s, paralajmëron për rrezikun e konflikteve të interesit:
“Duhet të garantojmë që zyrtarët publikë të mos kenë asnjë lidhje financiare me kompanitë që furnizojnë teknologjinë AI,” thotë ai.
Frikë dhe pasiguri në radhët e stafit
Në një agjenci që po përjeton shkurtim personeli dhe ngrirje të punësimeve, AI po shihet nga shumë punonjës më shumë si kërcënim sesa ndihmë. “Ne jemi të tejngarkuar dhe pa mbështetje. Kjo nuk është ndihmë – është një paralajmërim,” tha një punonjës në kushte anonimati.
Që nga viti 2015 nxisim shpirtin sipërmarrës, inovacionin dhe rritjen personale duke ndikuar në zhvillimin e një mjedisi motivues dhe pozitiv tek lexuesit tanë. Kjo punë që e bëjmë me shumë dashuri nuk ka të paguar. Ne jemi platforma e vetme e cila promovon modelin pozitiv të sipërmarrjes së lirë. Përmes kësaj platforme mbështesim edukimin gjatë gjithë jetës si mjet për zhvillimin personal dhe profesional të brezave. Kontributi juaj do të na ndihmojë në vazhdimin e këtij misioni në gjithë trevat shqipfolëse.
Mund të kontribuoni KETU. Falemnderit.
Albanian
English