Konfindustria do t’i kërkojë zyrtarisht qeverisë dhe Kuvendit të Shqipërisë të fillojë sa më shpejt përmirësimin e legjislacionit në fuqi, me qëllim ndalimin e marrëdhënieve shtetërore ligjore, lejeve, licencave, koncesione, privatizime, etj me subjektet tregtare të tipit të ashtuquajtur “guaskë” regjistruar në parajsat fiskale.
Përmes një komunikimi me mediat, Konfindustria vlerëson, se dhënia fund e marrëdhënieve shtetërore të drejtpërdrejta dhe të tërthorta me “guaskë” duhet të përfshijë të gjithë sektorët strategjikë si p.sh.naftë, energji, minierale, financë, bankë, transport, telekomunikacion, etj. Gjithashtu, është e domosdoshme, që të gjenden zgjidhje ligjore për të detyruar kompanitë e tipit “guaskë” të regjistruara në parajsa fiskale për t’u shpërbërë si dhe njohjen publike të pronarëve fizike dhe juridike përkatës.
Konfindustria vlerëson, se interesi publik është dëmtuar rëndë financiarisht në një numër të madh rastesh të marrëdhënieve tregtare dhe ligjore të shtetit shqiptar meë e regjistruara në parajsat fiskale. Rastet e dëmeve të mëdha financiare dhe ekonomike në afatgjatë të Armo, Albpetrol, koncesioneve në naftë, shërbime, PPP, etj. janë shembuj të qartë për sa më sipër.
Prania e kompanive “guaskë” shton rrezikun e korrupsionit qeveritar, prishjes se rregullave të konkurencës së lirë për biznesin, kapjen e shtetit, lirinë e medias me pasoja të drejtpërdrejta për demokracinë dhe deri në përcaktimin e suksesit të Reformës në drejtësi.
Që nga viti 2015 nxisim shpirtin sipërmarrës, inovacionin dhe rritjen personale duke ndikuar në zhvillimin e një mjedisi motivues dhe pozitiv tek lexuesit tanë. Mbështetja juaj na ndihmon ta vazhdojmë këtë mision.
Na Suporto
