Një fans muzikor nga Çikago ka regjistruar mijëra koncerte gjatë katër dekadave, dhe tani këto regjistrime po ruhen në një arkiv online të aksesueshëm lirshëm.
Aadam Jacobs nisi të regjistrojë koncertet në vitin 1984, fillimisht me një pajisje të thjeshtë që e huazoi nga gjyshja e tij, dhe më pas me regjistrues Sony Walkman. Ai ka mbledhur performanca nga artistë të njohur si Nirvana, R.E.M., The Cure dhe Tracy Chapman, si dhe regjistrime të artistëve më të vegjël. Një prej regjistrimeve më të hershme është një koncert i Nirvana-s në vitin 1989, dy vite para publikimit të albumit Nevermind.
Tani, vullnetarë në SHBA dhe Evropë po dixhitalizojnë dhe ngarkojnë këto regjistrime në Aadam Jacobs Collection, një arkiv jo-fitimprurës i vendosur në Internet Archive. Brian Emerick, përgjegjës për transferimin e regjistrimeve nga analoge në digjital, thotë se çdo muaj merr 10-20 kuti me 50-100 kaseta secila, të cilat më pas përpunohen nga vullnetarët për t’u ngarkuar online. Që nga fundi i vitit 2024, janë digjitalizuar mbi 5,500 kaseta.
Shumica e artistëve janë të kënaqur që performancat e tyre ruhen, dhe vetëm pak kanë kërkuar heqjen e regjistrimeve. Cilësia e regjistrimeve ka surprizuar vullnetarët, duke treguar se edhe pajisjet e thjeshta të përdorura nga Jacobs kanë dhënë rezultate të shkëlqyera.
Ky projekt, që dokumenton katër dekada muzikë, i lejon melomanët në mbarë botën të rikthehen te momentet historike të muzikës live, duke ruajtur një pjesë të rëndësishme të trashëgimisë muzikore.
Që nga viti 2015 nxisim shpirtin sipërmarrës, inovacionin dhe rritjen personale duke ndikuar në zhvillimin e një mjedisi motivues dhe pozitiv tek lexuesit tanë. Mbështetja juaj na ndihmon ta vazhdojmë këtë mision.
Na Suporto
