Vetëm 19% e punonjësve besojnë se liderët e tyre thonë të vërtetën. Një shifër që flet më shumë se çdo deklaratë vlerash dhe që ekspozon një nga problemet më të mëdha të organizatave moderne: mungesën e besimit.
Lexo gjithashtu: Mesazhet që nuk janë më vetëm tuajat: çfarë do të ndodh me Instagram në 8 Maj që nuk duhet injoruar!”
Edhe pse nocione si ndershmëria dhe integriteti janë pjesë e deklaratave të shumicës së kompanive, ato shpesh mbeten në letër. Realiteti i përditshëm në shumë vende pune tregon një hendek të thellë mes asaj që promovohet dhe asaj që praktikohet. E vërteta, në vend që të jetë normë, shpesh kthehet në një rrezik që duhet menaxhuar me kujdes.
Paradoksi është i dukshëm. Studimet tregojnë se një kulturë e bazuar në të vërtetën mund të rrisë performancën financiare me mbi 20%. Pra, përfitimet janë të matshme dhe të prekshme. Megjithatë, kjo nuk mjafton për ta bërë transparencën një praktikë të përditshme, sepse problemi nuk qëndron te njohja e vlerës së saj, por te mënyra si organizatat e trajtojnë atë në realitet.
Në shumë raste, punonjësit hezitojnë të flasin hapur. Jo sepse nuk kanë çfarë të thonë, por sepse nuk ndihen të sigurt për pasojat. Frika nga reagimi i drejtuesve, nga etiketime negative apo nga penalizime të drejtpërdrejta krijon një klimë ku heshtja bëhet zgjedhja më e sigurt. Dhe kjo nuk ndodh vetëm në situata të mëdha; shpesh fillon nga detaje të vogla, nga një feedback i pa dhënë apo një problem i lënë pa adresuar.
Mënyra se si liderët reagojnë ndaj të vërtetës luan një rol vendimtar. Çdo reagim krijon një precedent. Nëse një informacion i sinqertë pritet negativisht, mesazhi që transmetohet është i qartë: më mirë mos fol. Në këtë mënyrë, kultura e heshtjes ndërtohet gradualisht dhe bëhet pjesë e ADN-së së organizatës.
Ndërtimi i një kulture të bazuar në të vërtetën nuk kërkon ndryshime dramatike, por konsistencë. Fillon me gjeste të vogla: një feedback i sinqertë, një pranim gabimi, apo një vlerësim i hapur për një punë të bërë mirë. Këto janë momentet që krijojnë besim dhe që, me kalimin e kohës, e bëjnë transparencën pjesë të natyrshme të komunikimit.
Diferenca mes kompanive që flasin për vlera dhe atyre që i jetojnë ato bëhet e dukshme pikërisht këtu. Sepse e vërteta nuk është një deklaratë në mur, por një sjellje që përsëritet çdo ditë. Dhe në një ambient ku besimi është gjithnjë e më i rrallë, kjo sjellje kthehet në avantazh real.
Që nga viti 2015 nxisim shpirtin sipërmarrës, inovacionin dhe rritjen personale duke ndikuar në zhvillimin e një mjedisi motivues dhe pozitiv tek lexuesit tanë. Mbështetja juaj na ndihmon ta vazhdojmë këtë mision.
Na Suporto
