Agjërimi i ndërprerë është kthyer në një nga trendet më të përhapura për humbjen e peshës, duke premtuar kontroll më të mirë të sheqerit në gjak, më shumë energji dhe madje jetëgjatësi. Por shumë persona përballen me të njëjtin zhgënjim: sapo ndalin regjimin, kilogramët e humbur rikthehen shpejt.
Sipas Dr. Trisha Pasricha, mjeke në Beth Israel Deaconess Medical Center dhe pedagoge në Harvard Medical School, agjërimi i ndërprerë funksionon në muajt e parë kryesisht sepse kufizon marrjen e kalorive. Modelet si 16:8 apo agjërimi një ose dy ditë në javë reduktojnë spontanisht sasinë e ushqimit. Megjithatë, sfida kryesore është që ky regjim shpesh nuk është i qëndrueshëm në afat të gjatë.
“Te një numër i madh njerëzish, pesha trupore me kalimin e kohës kthehet”, thekson Pasricha. Sipas saj, deri më tani nuk ka prova të forta që agjërimi i ndërprerë ul ndjeshëm rrezikun e sëmundjeve kardiovaskulare, kancerit apo që zgjat jetëgjatësinë, pavarësisht reputacionit që ka fituar në rrjetet sociale.
Ekspertët shpjegojnë se rikthimi i kilogramëve lidhet shpesh me braktisjen e papritur të rregullave strikte. Orët e kufizuara të ushqimit bien ndesh me jetën reale, angazhimet e punës, familjen dhe aktivitetet shoqërore. Kur regjimi thyhet vazhdimisht, shumë persona përjetojnë ndjenjë dështimi dhe rikthehen te zakonet e vjetra, shpesh me episode mbingrënieje. Ky cikël njihet si efekti “yo-yo”.
Po ashtu, modelet restriktive mund të ndikojnë psikologjikisht, duke nxitur obsesion me ushqimin dhe ndjenjë faji. Agjërimi nuk rekomandohet për persona me çrregullime të të ushqyerit, disbalanca hormonale, stres kronik apo për gratë shtatzëna dhe gjidhënëse.
Në vend të metodave ekstreme, specialistët sugjerojnë zakone më të qëndrueshme: konsumimin e mëngjesit brenda një ore nga zgjimi, me proteina dhe fibra të mjaftueshme; shmangien e ushqimeve shumë të përpunuara; si dhe përfundimin e vakteve dy deri në tre orë para gjumit. Një dietë e bazuar në perime, fruta, bishtajore, drithëra integrale, arra dhe fara mbetet strategjia me mbështetjen më të fortë shkencore për ruajtjen e peshës dhe shëndetin afatgjatë.
Mesazhi i mjekëve është i qartë, sekreti nuk qëndron te kufizimi ekstrem i orëve, por te zakonet që mund t’i mbani për gjithë jetën.
Që nga viti 2015 nxisim shpirtin sipërmarrës, inovacionin dhe rritjen personale duke ndikuar në zhvillimin e një mjedisi motivues dhe pozitiv tek lexuesit tanë. Mbështetja juaj na ndihmon ta vazhdojmë këtë mision.
Na Suporto
