Kolesteroli nën kontroll? Ja ushqimet që mund të bëjnë diferencën

Kolesteroli është thelbësor për trupin: ndihmon në ndërtimin e qelizave, prodhimin e hormoneve dhe vitaminës D. Por kur nivelet rriten mbi normë, rreziku për zemrën dhe enët e gjakut shtohet ndjeshëm. Lajmi i mirë? Ajo që vendosim në pjatë mund të ndikojë realisht në balancimin e tij.

Ekspertët theksojnë se zakonet e përditshme ushqimore janë vendimtare. Disa produkte jo vetëm që nuk e përkeqësojnë situatën, por mund të ndihmojnë në rregullimin e kolesterolit “të keq” LDL dhe triglicerideve.

Hudhra, për shembull, përmban përbërës aktivë që lidhen me uljen e LDL-së dhe përmirësimin e shëndetit kardiovaskular. Konsumi i rregullt, në sasi të moderuar, shpesh shoqërohet me parametra më të mirë të yndyrnave në gjak.

Farat e lirit janë një tjetër aleat i fuqishëm. Të pasura me fibra dhe acide yndyrore omega-3, ato ndihmojnë në uljen e kolesterolit dhe triglicerideve, ndërsa përmirësojnë edhe tretjen. Shtimi i tyre në kos, smoothie apo sallata është një mënyrë e thjeshtë për të përfituar vlerat ushqyese.

Edhe uthulla e mollës, e përdorur shpesh si suplement natyral, lidhet me kontroll më të mirë të sheqerit në gjak pas vakteve. Duke stabilizuar nivelin e glukozës, ajo ndikon indirekt në ekuilibrin e yndyrnave në gjak.

Ndërkohë, një studim i publikuar në korrik 2025 në The American Journal of Clinical Nutrition po sfidon një bindje të vjetër: se vezët rrisin kolesterolin. Sipas ekspertëve të Harvard Health, faktori kryesor që ndikon në rritjen e LDL nuk është kolesteroli nga ushqimi, por yndyrat e ngopura në dietë. Kjo do të thotë se demonizimi i vezëve mund të ketë qenë i tepruar.

Mesazhi i specialistëve është i qartë: nuk ka ushqim “magjik”, por një dietë e balancuar, e pasur me fibra, yndyrna të shëndetshme dhe e varfër në yndyrna të ngopura, mund të ndikojë ndjeshëm në mbajtjen nën kontroll të kolesterolit, dhe në mbrojtjen e zemrës.