CEO i Meta-s, Mark Zuckerberg, planifikon të rrisë ndjeshëm shpenzimet e kompanisë për inteligjencën artificiale në vitin 2026, dhe Wall Street duket se është plotësisht dakord me këtë strategji.
Në raportin financiar për tremujorin e katërt, të publikuar të mërkurën, Meta tejkaloi pritshmëritë si për të ardhurat ashtu edhe për fitimin, duke bërë të ditur njëkohësisht se shpenzimet kapitale të lidhura me AI për këtë vit do të jenë nga 115 deri në 135 miliardë dollarë. Kjo shifër është pothuajse dyfish krahasuar me vitin e kaluar, kur kompania riorganizoi njësinë e saj të inteligjencës artificiale.
Edhe pse investitorët kanë shprehur më herët shqetësime për shpenzimet agresive të Meta-s në AI, rezultatet e fundit i kanë qetësuar tregjet. Kompania raportoi rritje vjetore prej 24% të të ardhurave, e nxitur kryesisht nga reklamat online. Si pasojë, aksionet e Meta-s u rritën deri në 10% në tregtimin pas orarit zyrtar.
“Teksa planifikojmë të ardhmen, do të vazhdojmë të investojmë shumë fuqishëm në infrastrukturë për të trajnuar modelet më të avancuara dhe për të ofruar ‘super inteligjencë personale’ për miliarda njerëz dhe biznese në mbarë botën,” tha Zuckerberg gjatë telefonatës me analistët. Ai iu referua veçanërisht ndërtimit të qendrave të mëdha të të dhënave (data centers), të cilat do të shërbejnë si bazë për projektet aktuale dhe të ardhshme të AI-së. Drejtoresha financiare e Meta-s, Susan Li, theksoi se kompania vazhdon të jetë “e kufizuar nga kapacitetet”, që do të thotë se ka nevojë për më shumë fuqi përpunuese për të përmirësuar biznesin kryesor të reklamave, si dhe për t’i dhënë ekipit të AI-së burimet e nevojshme për zhvillimin e modeleve më të avancuara. “Ekipet tona kanë bërë një punë shumë të mirë duke rritur infrastrukturën gjatë vitit 2025, por kërkesa për burime përpunuese është rritur edhe më shpejt sesa oferta jonë,” tha Li. Sipas Zuckerberg, viti 2026 do të jetë një vit kyç për AI-në, me investime të fokusuara në ndërtimin e asaj që ai e quan “super inteligjencë personale”.
Lexo edhe: Shqipëria drejt marrëveshjeve me vendet e treta për gjetjen e fuqisë punëtore
Megjithatë, mbetet ende e paqartë se sa shpejt Meta do të sjellë produkte të reja të AI-së që gjenerojnë të ardhura konkrete — një pyetje që Zuckerberg nuk e ka sqaruar plotësisht.
“Do të lançojmë produkte të reja gjatë gjithë vitit,” u shpreh ai. “Por e rëndësishme është se nuk po ndërtojmë vetëm një gjë të vetme — po ndërtojmë shumë gjëra paralelisht.” Një nga lëvizjet më të mëdha strategjike të Meta-s vitin e kaluar ishte investimi 14.3 miliardë dollarë në Scale AI, i cili solli në kompani themeluesin dhe CEO-n Alexandr Wang, së bashku me disa nga inxhinierët dhe studiuesit më të mirë. Wang tani drejton njësinë e re të AI-së në Meta, e cila po teston një model të ri të avancuar me emrin e koduar “Avocado”, që pritet të jetë pasardhësi i familjes së modeleve Llama. “Pres që modelet tona të para të jenë të mira, por më e rëndësishmja është që ato të tregojnë ritmin e shpejtë të progresit tonë,” tha Zuckerberg. “Më pas do të vazhdojmë të shtyjmë kufijtë e teknologjisë gjatë gjithë vitit.”
I pyetur pse Meta ka nevojë të zhvillojë një model të vetin themelor të AI-së, Zuckerberg theksoi se kompania është një “kompani thellësisht teknologjike” dhe nuk mund të rrezikojë të varet nga zhvillimet e aktorëve të tjerë.
“Nuk mund të jemi të kufizuar nga ajo që të tjerët ndërtojnë apo na lejojnë të ndërtojmë,” u shpreh ai, duke shtuar se kontrolli mbi modelin u jep kompanive mundësinë të formësojnë të ardhmen e produkteve.
Ndërkohë, reklamat online vazhdojnë të përbëjnë pjesën dërrmuese të të ardhurave të Meta-s. Për sa kohë ky biznes mbetet dominues në pajisjet mobile, tejkalon pritshmëritë dhe gjeneron miliarda dollarë cash çdo tremujor, Zuckerberg pritet të ketë hapësirë të mjaftueshme për të ndjekur ambiciet e tij të mëdha në inteligjencën artificiale.
Që nga viti 2015 nxisim shpirtin sipërmarrës, inovacionin dhe rritjen personale duke ndikuar në zhvillimin e një mjedisi motivues dhe pozitiv tek lexuesit tanë. Kjo punë që e bëjmë me shumë dashuri nuk ka të paguar. Ne jemi platforma e vetme e cila promovon modelin pozitiv të sipërmarrjes së lirë. Përmes kësaj platforme mbështesim edukimin gjatë gjithë jetës si mjet për zhvillimin personal dhe profesional të brezave. Kontributi juaj do të na ndihmojë në vazhdimin e këtij misioni në gjithë trevat shqipfolëse.
