Një raport i ri i publikuar nga Startup Genome, një prej burimeve më të besueshme për analizat e ekosistemeve startup në mbarë botën, ka hedhur dritë mbi qytetet që po udhëheqin tranzicionin drejt startup-eve të bazuara në inteligjencë artificiale (AI). Me të dhëna të mbledhura nga mbi 5 milionë startup-e në më shumë se 350 ekosisteme, ky raport përfaqëson një panoramë të thelluar, të mbështetur në prova, të garës për dominimin e ardhshëm teknologjik.
Rezultatet janë të qarta, Silicon Valley nuk po e humb statusin si epiqendra botërore e inovacionit. Me një pjesë të parashikuar prej 43% të vlerës globale të startup-eve të AI deri në vitin 2030, ajo dominon tabelën me një avantazh të jashtëzakonshëm. Në kontrast, qytetet e tjerë ndjekës si New York City (14.3%) dhe Pekini (7.7%) tregojnë fuqi rajonale, por nuk i afrohen dot gjigantit kalifornian.
Europa në hije! Azia Lindore, forca e re që vjen në rritje
Pas Silicon Valley dhe New Yorkut, një tjetër grupim qytetesh me Pekinin, Shangain, Tel Avivin dhe Seulin po ngrihen me shpejtësi si qendra të fuqishme të zhvillimit të AI. Kombinimi i politikave shtetërore mbështetëse, talentit lokal dhe investimeve të mëdha ka bërë që Azia të paraqitet si një nga rajonet më konkurruese në këtë garë. Pekini dhe Shangai kanë respektivisht 7.7% dhe 2.6% të pjesës globale të startup-eve të AI në parashikimin për 2030.
Lexo edhe: Analizë/ Startup-et në Shqipëri, një ekosistem në zgjerim me sfida dhe potencial!
Qytetet evropiane si Berlin (0.6%), Paris (0.8%), Amsterdam, Stokholm, dhe Zurich (të gjitha rreth 0.4–0.6%) kanë një prani të përhapur, por jo thelbësore në krahasim me rivalët globalë. Megjithatë, këto qendra janë të njohura për cilësinë më shumë sesa për vëllimin e inovacionit, një faktor që mund të mos pasqyrohet direkt në përqindjet e raportuara, por që ka ndikim afatgjatë.
India përfaqësohet me qytetin Bangalore, i cili ka një pjesë të vogël, por të qëndrueshme prej 2.9%. São Paulo shfaqet si përfaqësuesi më i fortë nga Amerika Latine, me 1.8%, duke treguar se edhe rajonet jashtë boshtit tradicional SHBA-Kinë-Evropë po fillojnë të krijojnë bazat e tyre në ekonominë e AI-së.
Kush mungon dhe pse kjo ka rëndësi?
Në këtë hartë të AI-së globale, shumë rajone, përfshirë Evropën Juglindore, Afrikën dhe Lindjen e Mesme (me përjashtim të Tel Avivit) nuk janë aspak të dukshme. Mungesa e tyre sinjalizon një boshllëk të madh në shpërndarjen e barabartë të zhvillimit teknologjik dhe sfida të mëdha për integrimin e këtyre tregjeve në ekonominë e së ardhmes.
Artikull ekskluziv i Business Magazine Albania.
Ky artikull gëzon të drejtën e autorësisë sipas Ligjit Nr. 35/2016, “Për të drejtat e autorit dhe të drejtat e lidhura me to”.
Artikulli mund të ripublikohet nga mediat e tjera vetëm duke cituar “Business Magazine Albania” shoqëruar me linkun e artikullit origjinal
Që nga viti 2015 nxisim shpirtin sipërmarrës, inovacionin dhe rritjen personale duke ndikuar në zhvillimin e një mjedisi motivues dhe pozitiv tek lexuesit tanë. Mbështetja juaj na ndihmon ta vazhdojmë këtë mision.
Na Suporto