Rikthehet ‘Muza Competition 4’, platforma që ndërthur kulturën dhe modën shqiptare

Muza Competition rikthehet këtë vit me edicionin e saj të katërt, duke sjellë më shumë ambicie, kreativitet dhe ndikim ndërkombëtar si kurrë më parë. Kjo nismë që është tashmë një nga platformat më të rëndësishme për të rinjtë shqiptarë në fushën e fashion-design-it, udhëhiqet nga znj. Andriola Kambo, Drejtoreshë Ekzekutive e Unionit të Bashkive Shqiptare në Rajon.

Edicioni i këtij viti e vendos theksin tek dialogu mes trashëgimisë kulturore shqiptare dhe shprehjes së saj nëpërmjet industrisë së modës, duke inkurajuar të rinjtë që të frymëzohen nga etnografia shqiptare për të krijuar koleksione unike dhe bashkëkohore. Muza nuk është thjesht një garë – është një hapësirë afirmimi dhe zhvillimi profesional, ku talenti takohet me vizionin dhe rrjetëzimi me eksperiencën.

Konkursi është i hapur për të gjithë të rinjtë e apasionuar pas dizajnit të modës, të moshës nga 18 deri në 35 vjeç. Procesi i aplikimit është i hapur deri më 28 prill 2025, në orën 17:00, në adresën zyrtare të projektit: muzacompetition@gmail.com. Pas përzgjedhjes paraprake, aplikantët do të kenë mundësinë të prezantojnë punimet e tyre përpara një jurie të përbërë nga emra të njohur të botës së artit, modës dhe medias shqiptare. Juria do të përzgjedhë dhjetë finalistë, të cilët do të shpalosin koleksionet e tyre në një event përmbyllës të nivelit të lartë, që pritet të kthehet në një ngjarje të rëndësishme kulturore.

Muza Competition synon të krijojë një skenë ku moda shqiptare të përfaqësohet denjësisht në arenën ndërkombëtare, përmes energjisë dhe shpirtit novator të brezit të ri. Pjesëmarrësit nuk përfitojnë vetëm mundësi prezantimi, por edhe njohje, mentorim dhe kontakte të vlefshme për të ardhmen e tyre profesionale.

Për më shumë informacion mbi rregullat e aplikimit dhe zhvillimin e konkursit, të interesuarit mund të vizitojnë faqen zyrtare të projektit: muzacompetition.com