Lumi i Vjosës në Shqipëri është një ndër lumenjtë e fundit të egër dhe të pa prekur nga dora e njeriut, që ekzistojnë në Europë. Me një gjatësi prej 270 km, i ndarë në kanione, lumenj të ndërthurur, ishuj dhe gjarpërime të rrëmbyeshme, Vjosa lidh shtetet e Europës së bashku. Ai është bërë habitati i shkëlqyer për një numër të madh speciesh dhe bimësh në rrezik zhdukje.
Prej vitesh, një sërë projektesh për ndërtime të hidrocentraleve kanë rrezikuar shkatërrimin e kësaj pasurie të Europës. Me ndërtimin e një dige, lumi shndërrohet në liqen dhe të gjithë speciet të cilat jetojnë aty vdesin.
Për ta parandaluar këtë janë ndërmarrë një sërë nismash prej vitesh për të shpallur Vjosën Park Kombëtar, në mënyrë që të mbrohet nga çdo lloj ndërtimi nga dora e njeriut. Kauza e Vjosës tashmë ka marrë zë jashtë Shqipërisë dhe madje edhe jashtë Europës. Leonardo Di Caprio ka qenë një ndër mbështetësit e kësaj kauze, nëpërmjet postimeve dhe thirrjeve në rrjetet e tij sociale për të ndërgjegjësuar qeverinë në mënyrë që Vjosa të shpallet “Park Kombëtar” dhe të ruhet biodiversiteti i saj.
Së fundi kushdo që mund të ketë dërguar dokumente përmes faqes së internetit wetransfer mund të ketë vënë re se i kanë dedikuar faqen e tyre fushatës së lumit të Vjosës.
Në një anketë ka rezultuar se 95% e shqiptarëve bien dakort me shpalljen e Vjosës “Park Kombëtar”. Pavarsisht se kryeministri i Shqipërisë ka deklaruar se Vjosa është një zonë e mbrojtur me ligj dhe të gjithë projektet janë anulluar, grupet të cilët po luftojnë për këtë kauzë presin që vullneti i shqiptarëve të bëhet realitet.
Që nga viti 2015 nxisim shpirtin sipërmarrës, inovacionin dhe rritjen personale duke ndikuar në zhvillimin e një mjedisi motivues dhe pozitiv tek lexuesit tanë. Kjo punë që e bëjmë me shumë dashuri nuk ka të paguar. Ne jemi platforma e vetme e cila promovon modelin pozitiv të sipërmarrjes së lirë. Përmes kësaj platforme mbështesim edukimin gjatë gjithë jetës si mjet për zhvillimin personal dhe profesional të brezave. Kontributi juaj do të na ndihmojë në vazhdimin e këtij misioni në gjithë trevat shqipfolëse.
