Por, me gjithë potencialin, kjo bukuri është e përkthyer në zero të ardhura në turizëm për zonën, e rrjedhimisht edhe buxhetin e shtetit.
Po t’u hidhni një sy artikujve ekonomikë të mediave ndër vite do të shikoni se si Kukësi kryeson në vend për nivelin e lartë të varfërisë. Varfëria është aq besnike, sa nuk e lë vendin të mbetet pa u përmendur çdo vit si i pari më i varfër në raportet e Institutit të Statistikave.
Dihet që zonat e thella malore, në çdo shtet vuajnë për aksesin në punë, apo dinamikën e ekonomisë. Por, (pa shkuar larg), vende të tilla si Italia, e kanë zgjidhur duke i njohur ato si rajone me status të veçantë, e lehtësitë u njihen në Kushtetutë.
Por, shifrat tregojnë, se vëmendja jo vetëm nuk ka qenë e veçantë për këtë zonë. Ka munguar tërësisht.
Të gjithë shqetësohemi, arkëtarët e buxhetit së pari, nëse niveli i Fierzës bie nga thatësirat, pasi duhen importuar qindra miliona euro energji (siç ndodhi vitin e kaluar me 120 milionë euro importe). Por pak kush mendon se mbi 30 mijë familjeve në ato zona u janë bërë kurban tokat pjellore, për të siguruar “elektrifikimin e vendit”. Lëvizja e parë ishte ndërtimi i një qyteti tërësisht të ri. Ndërkohë, me hapjen e ekonomisë nisi vala e imigrimit drejt periferive në Tiranë dhe Durrës.
Por, largimi i tyre nuk arriti të krijojë kushte më të mira për pjesën e mbetur. Vitet e fundit, mijëra banorë të kësaj zone u kthyen në azilantë ekonomikë në Gjermani.
Të dhënat zyrtare mbi ekonominë u japin të drejtë këtyre banorëve, ndonëse politikisht azilantët nuk njihen as në Gjermani e as në Shqipëri.
Sipas të dhënave të fundit të Institutit të Statistikave, të ardhurat për frymë në rajonin e Kukësit janë nën mesataren e rajoneve, me 343 mijë lekë në vit (mesatarja e Shqipërisë është 482 mijë lekë). Gjithçka lidhet me mungesën e tokës pjellore në dispozicion, (pas përmbytjes së luginave të ujitshme nga Fierza). Me 8 mijë hektarë, sipërfaqja e ujitur është sipërfaqja më e vogël e çdo rajoni tjetër në vend. Kontribut në varfëri kanë dhënë mungesa e sinkronizuar e investimeve private në zonë dhe investimeve publike. Asnjë emër për t’u përmendur investimesh në këtë drejtim, përjashtuar rilindjen e qendrës së Kukësit.
Rrjedhimisht, sipas të dhënave të INSTAT-it, rajoni siguron vlerën më të ulët të shtuar në çdo sektor të ekonomisë krahasuar me të gjitha rajonet e tjera. Kontributi në Prodhimin e Brendshëm Bruto, vlerësohet në 2.1% të totalit, më i ulëti ndër rajone.
Kjo mund të spjegojë deri diku pse tarifa e rrugës së Kombit është kaq e pa pranuar për familjet e kësaj zone.
Kushdo që ka shkuar në një shtet të huaj e di që në autostradat e rregulluara paguhet tarifë. Madje, për të pasur një rrugë të sigurt, të ndriçuar, e të mirëmbajtur aq sa të shmangë aksidentet, kushdo mund të jetë i gatshëm të kryejë një pagesë të pranueshme.
Një fjalë e jona popullore thotë “nuk nxirret dhjamë nga pleshti”. E këtë çdo qeveri duhet ta ketë parasysh, pasi nuk mund ta mbushë arkën e buxhetit nga një popullsi e varfër.
Për këtë arësye ekonomistët kanë sugjeruar vazhdimisht, se qeveria të rendë pas nxitjes së punësimit e jo rritjes së vazhdueshme të taksave e tarifave.
Nxitja e investimeve dhe vënia e ekonomisë në lëvizje në Kukës, Dibër, Librazhd, Korçë, etj. do ta bënte më të pranueshme pagesën e tarifës për mirëmbajtje rrugësh. Kujtojmë se edhe rruga e Dibrës, kur të bëhet…do të tarifohet gjithashtu, ashtu si edhe një listë e tërë rrugësh kombëtare, të miratuara tashmë për t’u bërë me pagesë.
Ministrat e Financave dhe të Energjisë, kanë theksuar ditët e fundit në tryezat apo komunikimet publike se investimet për rrugët kanë qenë të larta dhe rruga në këtë rast nuk është përfunduar. Ky është një lajm i hidhur për qytetarët. Pavarësisht të majta apo të djathta, qeveritë janë besuar për të bërë politika e investime efektive dhe nuk mund të hidhet topi sa andej-këtëj, duke i thënë qytetarit se: jemi të detyruar të aplikojmë tarifa të larta, ndonëse kemi shpenzuar shumë para e rrugën nuk e kemi mbaruar./ Albana Muçaj, BusinessMag.al
Që nga viti 2015 nxisim shpirtin sipërmarrës, inovacionin dhe rritjen personale duke ndikuar në zhvillimin e një mjedisi motivues dhe pozitiv tek lexuesit tanë. Kjo punë që e bëjmë me shumë dashuri nuk ka të paguar. Ne jemi platforma e vetme e cila promovon modelin pozitiv të sipërmarrjes së lirë. Përmes kësaj platforme mbështesim edukimin gjatë gjithë jetës si mjet për zhvillimin personal dhe profesional të brezave. Kontributi juaj do të na ndihmojë në vazhdimin e këtij misioni në gjithë trevat shqipfolëse.
Mund të kontribuoni KETU. Falemnderit.
