CEO i OpenAI, Sam Altman, ka pranuar se fjalët e mirësjelljes si “të lutem” dhe “faleminderit” drejtuar ChatGPT-së kanë një kosto befasuese për kompaninë, duke përfshirë shpenzime të konsiderueshme për energjinë elektrike. Deklarata erdhi pasi një përdorues në platformën X (ish-Twitter) e pyeti Altman-in për ndikimin financiar që mund të kenë në koston operacionale të OpenAI-së, fjalët e mirësjelljes. Altman u përgjigj duke e quajtur këtë humbje financiare “dhjetëra miliona dollarë të shpenzuar mirë”, dhe shtoi me një ton enigmatik: “Nuk i dihet kurrë.”
Shërbime si ChatGPT funksionojnë mbi të ashtuquajturat modele të mëdha gjuhësore (LLM), të cilat mbështeten në infrastrukturë të fuqishme kompjuterike, të vendosura në qendra të dhënash.
Këto modele kërkojnë mijëra GPU (njësi grafike përpunuese) me performancë të lartë për të operuar me efikasitet dhe për të ofruar përgjigje në kohë reale ndaj kërkesave të përdoruesve.
Fuqizimi i kësaj infrastrukture kërkon sasi të mëdha të energjisë elektrike. Vlerësimet tregojnë se prodhimi i një përgjigjeje të vetme nga AI , si një email i shkurtër apo paragraf, mund të konsumojë deri në 0.14 kilovat-orë (kWh) energji, e barasvlefshme me mbajtjen ndezur të 14 llambave LED për një orë.
Kur kjo përshkallëzohet në miliarda ndërveprime çdo ditë, kostoja energjetike bëhet tepër e rëndësishme. Aktualisht, qendrat e të dhënave llogaritet të konsumojnë rreth 2% të energjisë elektrike globale. Me zgjerimin e shpejtë të aplikacioneve të inteligjencës artificiale, ekspertët paralajmërojnë se kjo përqindje pritet të rritet ndjeshëm në vitet në vijim.
Edhe pse për disa, përdorimi i mirësjelljeve ndaj chatbot-it mund të duket i panevojshëm, disa ekspertë të AI-së argumentojnë se mirësjellja ndikon ndjeshëm në mënyrën si zhvillohen këto ndërveprime.
Lexo edhe: Kosova drejt së ardhmes digjitale, panel për kriptovalutat në BlockTalk
Kurtis Beavers, drejtor në ekipin e dizajnit për Microsoft Copilot, ka theksuar rëndësinë e fjalive të sjellshme, duke thënë se ato “ndihmojnë në prodhimin e përgjigjeve bashkëpunuese dhe të respektueshme.”
Sipas tij, mirësjellja nuk është thjesht një shprehje e edukatës së mirë, por ndikon drejtpërdrejt edhe në tonin e përgjigjes që jep AI, duke krijuar një komunikim më konstruktiv dhe profesional.
“Kur AI dallon një ton të sjellshëm, ka më shumë gjasa të përgjigjet me të njëjtën sjellje,” theksohet në Microsoft WorkLab, një publikim digjital i dedikuar integrimit të inteligjencës artificiale në vendin e punës.
Mirësjellja ndaj AI-së po bëhet gjithnjë e më e zakonshme. Një sondazh i vitit 2024 tregoi se rreth 67% e përdoruesve amerikanë përdorin rregullisht një gjuhë të sjellshme gjatë komunikimit me chatbot-ët. Brenda këtij grupi, 55% besojnë se është etikisht e drejtë të jesh i sjellshëm, ndërsa 12% thanë me humor se kjo është një mënyrë për t’u mbrojtur nga një “revolucion i mundshëm i makinave”.
Burimi: NY Post
Që nga viti 2015 nxisim shpirtin sipërmarrës, inovacionin dhe rritjen personale duke ndikuar në zhvillimin e një mjedisi motivues dhe pozitiv tek lexuesit tanë. Kjo punë që e bëjmë me shumë dashuri nuk ka të paguar. Ne jemi platforma e vetme e cila promovon modelin pozitiv të sipërmarrjes së lirë. Përmes kësaj platforme mbështesim edukimin gjatë gjithë jetës si mjet për zhvillimin personal dhe profesional të brezave. Kontributi juaj do të na ndihmojë në vazhdimin e këtij misioni në gjithë trevat shqipfolëse.
Mund të kontribuoni KETU. Falemnderit.
