Strategjitë që ndjek kompania shqiptare që udhëheq tregun edhe në Maqedoni e Kosovë » Business Magazine Albania – Media Dixhitale dedikuar Sipërmarrjes
Përditësuar së fundmi: 24/12/2018

Strategjitë që ndjek kompania shqiptare që udhëheq tregun edhe në Maqedoni e Kosovë

Share
nga Anerola Torollari
Dhj 24, 2018
Studied at Faculty of Science, Content Editor Biznesi at Business Magazine
lexo me teper >

Ndoshta janë më të njohura rastet e shqiptarëve që kanë lënë vendin tonë, dhe që sot pas shumë vitesh punë mund të drejtojnë kompani apo biznese të tyre në Greqi.

Më të pakta janë ato të fqinjëve grekë, që punën dhe suksesin e tyre kanë ardhur ta sjellin në Shqipëri.

Një histori e veçantë “shtegëtimi truri” nga Greqia drejt Shqipërisë është ajo e Alexandros Kosenas, ose Aleksit sikurse e thërrasin bashkëpunëtorët e tij më të ngushtë.

Me një përvojë 20 vjeçare në sektorin e shitjes së mallrave të autorizuar me pakicë, nga të cilat 16 vite përvojë në sferën ndërkombëtare, prej 11 vitesh ai është Drejtori Ekzekutiv i një prej kompanive më të suksesshme shqiptare, Neptun, pjesë e Grupit Balfin, që operon me rezultate të larta edhe në disa tregje të tjera të rajonit.

Kosenas la Greqinë për t’iu bashkuar Neptunit, kur kompania ishte ende në një fazë të qëndrueshme prej disa vitesh, por duket se në këtë dekadën e fundit rezultatet flasin për një rritje eksponenciale, aq sa kjo kompani e Grupit Balfin sot zotëron thuajse 3/5 të tregut ku vepron. Ata që e njohin mirë tregun e Retail i atribuojnë atij ndërthurjen e disa risive në vend si promocionet e posaçme sezonale, vlerat e shtuara në shërbimin ndaj klientit, si dhe zbatimin e modelit të parë operacional të “Franchise” në Shqipëri, që nënkupton dhënien e autorizimit të përdorimit të produkteve dhe emrit të markës ndaj palëve të treta, që duhet të zbatojnë rigorozisht çdo rregull të Neptun.

Ai shprehet se e adhuron kulturën e Shqipërisë dhe se është përshtatur shpejt me vendin tonë. Ndërsa kur është fjala për punë, Aleksi është një person që nuk e ka për zakon të pushojë gjatë, sidomos kur bëhet fjalë për të përqafuar ide dhe modele të reja biznesi, të cilat orientojnë drejt të ardhmes.

Në një kohë kur Shqipëria dhe Greqia janë në një epokë kyçe të marrëdhënieve dypalëshe, histori të suksesit në biznes si ajo e Kosenasit në Shqipëri, janë ura të forta bashkimi.

Ai shpjegon më në detaj aventurën e tij shqiptare përmes kësaj interviste.

Cilat janë pozitat e Neptunit në tregun shqiptar dhe sa progres është bërë 10 vitet e fundit?

Neptun ka 25 vite që operon në Shqipëri dhe është i vetmi shitës me pakicë me një prezencë ndërkombëtare, jashtë kufijve shqiptarë. Sot ne jemi kompania më e madhe operuese në segmentin tonë dhe jemi kompania e parë që u vjen konsumatorëve në mendje kur duhet t’i drejtohen dyqaneve të sektorit tonë. Gjithashtu, Neptuni është ndërmjet 35 kompanive më të mëdha në vend. Në vitin 2008, ne kishim vetëm 6 pika shitjeje, ndërkohë që sot kemi 26 dyqane Neptun dhe 3 dyqane SmartPoint. Gjatë këtyre viteve ne kemi përmirësuar afërsinë tonë me konsumatorin duke e rritur rrjetin tonë dhe duke i sjellë produktet dhe shërbimet tona në thuajse çdo qytet të Shqipërisë me mbi 30.000 banorë. Duke konsideruar strukturën gjeografike dhe demografike të Shqipërisë unë shoh vend edhe për 5 pika të tjera shitjeje të Neptunit anembanë vendit. Megjithatë, të rrisësh afërsinë nuk mjafton. Në këtë fazë, fokusi ynë është përmirësimi i përvojës së klientit, ndaj ne kemi investuar në rimodelimin e rrjetit tonë, ku shembulli më i mirë është dyqani jonë i ri në QTU në Tiranë, për të cilin jam krenar të them se ka përcaktuar standardet e industrisë sonë për vitet e ardhshme. Gjithashtu, tregtia online së fundmi është bërë një njësi biznesi për ne dhe duke nisur nga 2019 kemi planifikuar përmirësime të mëdha sa i takon pranisë tonë online.

Neptun ka kohë që operon edhe në dy tregje të tjera ballkanike, përveç Shqipërisë…

Ne veprojmë në tre shtete me një numër total prej 62 pika shitjeje. Përveç Shqipërisë ne jemi të pranishëm në Maqedoni me 25 dyqane dhe në Kosovë me 11 të tilla. Sot në secilin prej këtyre tregjeve ne jemi rishitësi i autorizuar më i madh i produkteve elektronike me rezultate tepër të suksesshme.

Ju keni 10 vite në Shqipëri dhe vini nga përvoja e një tregu më të madh sikurse është ai grek. Cilat janë dallimet më të mëdha midis dy tregjeve?

Tregu grek është një treg fqinj që ka një traditë të gjatë në industrinë e shitjes së organizuar me pakicë dhe ka më tepër rregulla, kështu që në disa pjesë shërben si një pikë interesante orientimi. Sjellja e klientit dhe kultura në të blerë kanë shumë ngjashmëri duke qenë se lidhjet tregtare mes dy vende janë të forta. Për shembull sezonet e uljeve janë shumë të ngjashme mes dy vendeve, si për shembull festat e Fund-Vitit janë sezoni më i fortë i vitit.

Cila është gjendja e kërkesës në tregun shqiptar në këtë moment? Mund të na thoni disa nga trendet e konsumatorit shqiptar dhe atij rajonal?

Nga pikëpamja ime tregu shqiptar ka një potencial të madh por trendi më i dukshëm sot është një prirje e qartë nga ana e konsumatorëve shqiptarë për t’iu drejtuar pikave të shitjes së organizuar me pakicë. Konsumatorët janë më të informuar, të përditësuar dhe më kërkues e selektivë ndërmjet shitësve të autorizuar me pakicë dhe ky është një sinjal pozitiv. Ky trend është krijuar gjithashtu nga një investim serioz i industrisë së retail-it, si Qendrat Tregtare me qiramarrës të ankoruar në to, rrjetet e organizuara të llojit FMCG (Mallrat e Konsumit me Lëvizshmëri të Shpejtë), shitësit e autorizuar me pakicë të industrisë së modës dhe sigurisht segmenti i pajisjeve elektro-shtëpiake.

Në mediat vendase ngrihet shpesh shqetësimi për emigrimin e shqiptarëve jashtë vendit. Sa e cënon kjo tregun?

Unë mendoj se emigrimi i shqiptarëve jashtë vendit e ka prekur dhe do të vazhdojë ta prekë çdo sektor të biznesit, kështu që edhe sektori ynë nuk përbën përjashtim. Kjo është një sfidë me të cilën po përballet çdo kompani por sektori lokal privat ka një influencë shumë të kufizuar në të. Në këtë moment po punojmë mbi disa skenarë të ndryshëm dhe na duhet që të zbatojmë një strategji përshtatjeje për shkak të këtij fenomeni.

Ekonomistët thonë se diferencimi i produkteve e rrit fitimin, a qëndron kjo?

Absolutisht po, ne e shohim këtë prirje në shumë sektorë, duke qenë se e mira e të ndjekurit e kësaj strategjie marketingu është se ajo është e dukshme. Përmes diferencimit të produktit, bizneset krijojnë vlera të shtuara, rrisin besnikërinë e klientëve ndaj markës së tyre dhe përmirësojnë perceptimin mbi markën e tyre.

Neptun është pjesë e Grupit Balfin, një prej grupeve me të mëdha të investimeve në rajon. Sa ndihmon kjo?

Balfin është grupi më i madh i investimeve në vend, prania e tij në majat e ndërtimit dhe operimit të Qendrave Tregtare mbulon aktivitete si në Elektronike, Veshje, Ushqime, produkte sezonale, etj. Brenda Grupit ka njohuri të mëdha mbi funksionimin e operacioneve të sektorit të retail dhe ka sinergji të mëdha ndërmjet kompanive të kësaj fushe. Për shembull në elektronikën e konsumit, Neptun (international) ka fuqi më të madhe negociuese me markat tona partnere (si Beko, LG, Samsung, etj), ndaj në saj të kësaj sinergjie ne jemi në gjendje të sigurojmë çmime më të ulëta në shitje. Për më tepër që edhe gjendja financiare e Grupit u mundëson kompanive të saj që të ndërmarrin investime në infrastrukturën e tyre dhe të fuqizojnë pozitat e tyre konkurruese në fushat ku veprojnë. Dhe së fundmi, por jo më pak e rëndësishmja, falë statusit tërheqës për të qenë punonjës i Grupit Balfin ne kemi akses te burimet cilësore njerëzore, që është një faktor kyç për suksesin e organizatës tonë.

Si funksionon konkurrenca në tregun shqiptar, a është ajo e ndershme, apo ju duhet të përballeni edhe me goditje nën brez?

Unë e kam thënë edhe më parë që Neptun mbështet konkurrencën e ndershme mes rrjeteve të shitjes. Jetojmë në një mjedis konkurrues dhe na duhet të gjithëve të punojmë për qëndrueshmërinë e korporatave tona dhe për benefitet e klientëve tanë. Por duhet të ketë rregulla mbi mënyrën se si një kompani e reklamon avantazhin e saj konkurrues, duhet të ketë respekt kundrejt nevojave të konsumatorit dhe për këtë duhet të ketë një organ aktiv dhe rregullues shtetëror, i cili duhet të monitorojë këto veprime. Sigurisht, klientët janë ata që kanë fjalën e fundit dhe ata vlerësojnë se cili rrjet po i mban apo jo premtimet e dhëna por kompanitë dhe autoritetet shtetërore kanë një rol të rëndësishëm rregullator në këtë mes. Konsumatori duhet të mbrohet për zgjedhjet e tij si dhe ndaj informacionit që i serviret.

A është e vështirë të qëndrosh në majë në një treg ku ka ende shumë infortmalitet dhe ku thuajse çdo pagesë bëhet me para në dorë?

Informaliteti është gjithnjë një sfidë e madhe për çdo kompani që zbaton rregullat. Sigurisht, në pozitat tona në treg është e qartë se pavarësisht vështirësive të mjedisit ku operojmë, zbatimi korrekt i një strategjie biznesi sjell rritjen e synuar. Por nga ana tjetër, një ambient pa rregulla është një pengesë për kompanitë por operon njëkohësisht edhe kundër konsumatorit. Një mjedis me rregulla nxit konkurrencën e shëndetshme dhe i ndihmoj bizneset të investojnë në projektet afatgjata si dhe i mundëson klientëve që të zbulojnë vlerën e vërtetë që qëndron pas çmimit të produkteve që blejnë.

Kompania juaj ndërmerr edhe nisma sociale për të ndihmuar shoqërinë, a nuk ka kosto kjo?

Nuk i shoh aktivitetet e Përgjegjësisë Sociale si kosto apo fitim për kompaninë tonë, ato janë më tepër një detyrim që ne kemi kundrejt shoqërisë. Vitet e fundit kemi mbëhstetur aktivisht organizata që ndihmojnë fëmijët me Sindromën Down. Ndihemi me të vërtetë krenarë për kontributin e dhënë por do të doja të theksoja, se në nivel Grupi, mbështetja e Balfin është shumë më e madhe dhe e gjerë se sa kaq.

Ju vini nga vendi i Sokratit dhe Aristotelit, cila është filozofia juaj në të bërin biznes?

Filozofia ime në të bërin biznes frymëzohet në të vërtetë nga dy karakteristika sjelljeje: një qasje e orientuar drejt zgjidhjeve dhe një përpjekje e vazhdueshme dhe e pafundme drejt përmirësimit gradual. Me pak fjalë, unë besoj se duke përdorur pikat e duhura të referimit dhe duke u përpjekur të përmirësosh pikat e dobëta e çon një kompani drejt përmirësimit të vazhdueshëm dhe e mban gjithnjë në shina me potencial të plotë.

Një artikull i një reviste të specializuar pretendonte se Neptun zotëron mbi 60% të tregut të elektro-shtëpiakeve në vend. A është e mundur një rritje edhe përtej kësaj?

Neptun e ka siguruar këtë pjesë të tregut gradualisht dhe me shumë përpjekje e investime. Besoj se kemi hedhur themelet e duhura për ta ruajtur pozitën tonë ne treg. Ne kemi marrëdhënie strategjike me liderët kryesorë të industrisë, dhe në të njëjtën kohë ndërmarrim veprimet e nevojshme në mënyrë që të optimizojmë eksperiencën e konsumatorit dhe ta mbajmë markën në nivelin e kërkuar. Sigurisht, ne operojmë në një ambient shumë konkurrues dhe dinamik dhe në mënyrë që të jetë e suksesshme një kompani duhet të jetë gjithnjë e vëmendshme dhe, e aftë të kuptojë trendet globale dhe t’i përshtasë ato me tregun vendas. Për sa i takon mundësisë për t’u rritur edhe më, përgjigja është pozitive, pasi ka kategori ku Neptuni ka një potencial rritjeje të mëtejshme por më e rëndësishmja është që kjo rritje të jetë e qëndrueshme dhe jo afat-shkurtër. Ndaj ne mbetemi të fokusuar te vizioni ynë që është ai i të qenit “gjithnjë të parët në mendjen” e klientëve tanë kur është fjala për tregun e elektro-shtëpiakeve dhe njëkohësisht t’i udhëheqim tregjet ku operojmë për sa i takon volumit, fitimit dhe mbulimit gjeografik.

Subscribe në kanalin tonë në YouTube