Sot, akrepat e orës janë zhvendosur 60 minuta mbrapa. Në gjithë vendet e Europës, ora ndryshoi në të njëjtin çast, për të patur diell apo dritë një orë më shumë, deri më 29 mars të vitit 2021, kur të kthehet sërish ora verore. Ndryshimi i njëtrajtshëm i orës në Europë filloi në vitin 1974, pas krizës së parë të naftës, në mënyrë që të shfrytëzonin më shumë dritën e diellit dhe të konsumonin më pak energji elektrike.
Sigurisht që në epokën ku jetojmë, diçka e tillë kalon pa u vënë re sepse detyrën për këtë kthim mbrapsht të akrepave e bën automatikisht teknologjia. Por, ekzistojnë ende disa orë që duhen përshtatur manualisht dhe dita e ndryshimit të orës përbën një ditë pune intensive për stafin e Mbretëreshës Elizabeth. Mendohet se do të shpenzohen 40 orë kohë për të ndryshuar akrepat e rreth 1000 orëve që zotëron Mbretëresha. 600 ndodhen në Buckingham Palace, 400 në Kështjellën Windsor dhe 50 në Palace of Holyroodhouse.
LEXO: Të dielën ndryshon ora/ Ndoshta për herë të fundit, akrepat kthehen 60 minuta pas
Për ta bërë këtë punë edhe më të vështirë, duket se përgjegjësia për ndryshimin e orëve në një vend është e vetëm një personi. Fjodor van den Broek tha për BBC se atij do t’i duhen 16 orë kohë për të kthyer mbrapsht akrepat e orëve në Kështjellën Windsor. “Jam vetëm unë dhe kam një koleg në Buckingham Palace që ndërron të gjithë orët atje. Përveç kësaj pune në këtë ditë të vitit, kam detyrën që t’i kontrolloj çdo javë pasi disa ulin ritmin dhe disa e shtojnë, duke ecur përpara. Kanë nevojë për mirëmbajtje sepse disa prej orëve janë 200 apo 300-vjeçare”, shpjegon Fjodor van den Broek.
Debati për orën e verës
Që nga viti 1996 të gjitha vendet e Bashkimit Evropian – plus Zvicra dhe vendet e Evropës Lindore – kanë miratuar të njëjtin kalendar për orën e verës, pavarësisht nga polemikat e shumta. Në verën e vitit 2018, Parlamenti Evropian miratoi heqjen e detyrimit që vendet anëtare të kalojnë nga një orë në tjetrën dy herë në vit. Secili shtet është i lirë të vendosë deri në prill 2021 nëse do të miratojë orën e verës, kohën diellore përgjithmonë ose të vazhdojë t’i alternojë ato. Vendet në Veri, të tilla si Finlanda dhe Polonia, po bëjnë presion për fundin e saj , ndërsa ato në Jug po lëvizin në drejtim të kundërt. Franca tashmë është shprehur me një votim popullor për ta mbajtur atë gjatë gjithë vitit. Nga ana tjetër, Italia vazhdon ta alternojë atë, veçanërisht për arsye ekonomike: ora e verës lejon të ndizni dritat një orë më vonë, me kursime të konsiderueshme.
Kursim energjie
Qëllimi i orës së verës që nga prezantimi i tij, në fakt, është të lejojë kursimin e energjisë falë përdorimit më të vogël të ndriçimit elektrik. Terna, kompania përgjegjëse në Itali për menaxhimin e rrjetit energjetik, vlerëson kursimet e lejuara nga miratimi i orës së verës: në periudhën midis viteve 2004 dhe 2012 ajo tejkaloi 6 miliard kilovat orë me një kosto më të ulët prej 900 milion euro.
Që nga viti 2015 nxisim shpirtin sipërmarrës, inovacionin dhe rritjen personale duke ndikuar në zhvillimin e një mjedisi motivues dhe pozitiv tek lexuesit tanë. Kjo punë që e bëjmë me shumë dashuri nuk ka të paguar. Ne jemi platforma e vetme e cila promovon modelin pozitiv të sipërmarrjes së lirë. Përmes kësaj platforme mbështesim edukimin gjatë gjithë jetës si mjet për zhvillimin personal dhe profesional të brezave. Kontributi juaj do të na ndihmojë në vazhdimin e këtij misioni në gjithë trevat shqipfolëse.
Mund të kontribuoni KETU. Falemnderit.
