Tregjet europiane u hapën me rënie të hënën në mëngjes, ndërsa çmimi i naftës u rrit, si reagim ndaj sulmeve ajrore të Shteteve të Bashkuara ndaj objekteve bërthamore dhe ushtarake iraniane gjatë fundjavës. Situata vjen mes përshkallëzimit të tensioneve midis Iranit dhe Izraelit, që të hënën vazhduan të shkëmbejnë raketa.Çmimi i naftës Brent u rrit me 1.53%, duke arritur në 78.19 dollarë për fuçi, ndërsa nafta amerikane WTI u rrit me 1.48%, në 74.93 dollarë për fuçi, rreth orës 7:15 të mëngjesit.
Shtetet e Bashkuara konfirmuan se kishin goditur tri objekte iraniane, duke argumentuar se Teherani nuk duhet lejuar të zotërojë armë bërthamore. Presidenti iranian, Masoud Pezeshkian, deklaroi se vendi i tij “nuk do t’i dorëzohet kurrë shantazhit dhe shtypjes”, ndërkohë që ministri i Jashtëm, Abbas Araghchi, ndodhet në Moskë për bisedime me presidentin rus Vladimir Putin.
Tregjet financiare europiane reaguan me pesimizëm. Indeksi FTSE 100 ra me 0.28%, CAC 40 me 0.66%, DAX me 0.55% dhe FTSE MIB me 0.97%. Indekset paneuropiane STOXX 600 dhe EURO STOXX 50 ranë përkatësisht me 0.28% dhe 0.26%.
Lexo edhe: Liderët europianë shqetësohen për varësinë e tyre të madhe nga teknologjia amerikane
Edhe tregjet amerikane u prekën. Kontratat e së ardhmes për S&P 500 ranë me 0.13%, ato për Dow Jones me 0.2%, dhe për Nasdaq me 0.18%. Në Azi, tregjet si Nikkei 225 në Tokio, Kospi në Seul dhe ASX 200 në Australi shënuan gjithashtu rënie, përkundër një rritjeje të lehtë në Hong Kong dhe Shanghai.
Përshkallëzimi i konfliktit ka rikthyer në qendër të vëmendjes ngushticën e Hormuzit, një rrugë strategjike ku kalon një pjesë e madhe e naftës botërore. Disa anije të mëdha nafte janë parë të bëjnë manovra kthimi, ndërsa kompania Maersk deklaroi se po vazhdon operimet, por po monitoron nga afër rrezikun.
Ekspertët paralajmërojnë se nëse Irani mbyll Hormuzin, kjo mund të shkaktojë jo vetëm një valë të re rritjeje çmimesh për naftën dhe mallrat e transportuara, por edhe pasoja inflacioniste në SHBA, që mund të vonojnë uljen e normave të interesit.
Ndërkohë, presidenti amerikan Donald Trump ndezi edhe më tej tensionet, duke përmendur mundësinë e një “ndryshimi regjimi” në Iran: “Nëse regjimi aktual nuk mund ta bëjë Iranin të madh sërish, përse të mos ketë një ndryshim regjimi?”, shkroi ai në Truth Social. Megjithatë, zëvendëspresidenti J.D. Vance ka mohuar se administrata kërkon një skenar të tillë.
Që nga viti 2015 nxisim shpirtin sipërmarrës, inovacionin dhe rritjen personale duke ndikuar në zhvillimin e një mjedisi motivues dhe pozitiv tek lexuesit tanë. Kjo punë që e bëjmë me shumë dashuri nuk ka të paguar. Ne jemi platforma e vetme e cila promovon modelin pozitiv të sipërmarrjes së lirë. Përmes kësaj platforme mbështesim edukimin gjatë gjithë jetës si mjet për zhvillimin personal dhe profesional të brezave. Kontributi juaj do të na ndihmojë në vazhdimin e këtij misioni në gjithë trevat shqipfolëse.
Mund të kontribuoni KETU. Falemnderit.
