Kriza e çmimeve ka ulur besimin e konsumatorëve në ekonomi, duke e çuar në nivelin më negativ që prej fillimit të pandemisë. Sipas vrojtimit të Bankës së Shqipërisë ky pesimizëm i qytetarëve është diktuar nga pritjet e tyre më të ulëta për gjendjen e tyre financiare dhe situatën e përgjithshme ekonomike të vendit.
Parashikimet e tyre për blerje aktuale shënuan rënie duke reflektuar pamundësi për të bërë shpenzime, ndërsa i druhen çmimeve të larta të mallrave të konsumit edhe në të ardhmen.
Përkeqësimi i besimit konsumator që shënoi tkurrje me 6.7% në mars, bëri që treguesi i ndjesisë ekonomike të bjerë sërish për të tretin muaj radhazi me 2%, duke reflektuar edhe efektet e krizës së pandemisë fillimisht, e më pas goditjen që po jep shtrenjtimi i çmimeve.
Veç tyre, në anketën e bankës qendrore që shërben si një matës i gjendjes së përgjithshme ekonomike për sipërmarrjet dhe qytetarët, rezulton se edhe bizneset e tregtisë janë më pesimiste si pasojë e vlerësimeve më të ulëta për ecurinë aktuale të aktivitetit të tyre.
Ndërtimi vijon të mbetet i palëkundur dhe shfaqet optimist si në ecurinë e aktivitetit ndërtues ashtu edhe në pritshmëritë e ndërmarrjeve të sektorit për rritje të çmimeve. Ndërsa vlerësimet për porositë aktuale, pësuan rënie.
Ecuria pozitive e kontratave porositëse ka bërë që edhe bizneset e sektorit të industrisë të jenë më optimiste dhe ashtu si për sektorët e tjerë, edhe këto sipërmarrje presin shtrenjtim të mëtejshme të çmimeve, diktuar nga situata e krijuar prej luftës Rusi-Ukrainë.
Që nga viti 2015 nxisim shpirtin sipërmarrës, inovacionin dhe rritjen personale duke ndikuar në zhvillimin e një mjedisi motivues dhe pozitiv tek lexuesit tanë. Kjo punë që e bëjmë me shumë dashuri nuk ka të paguar. Ne jemi platforma e vetme e cila promovon modelin pozitiv të sipërmarrjes së lirë. Përmes kësaj platforme mbështesim edukimin gjatë gjithë jetës si mjet për zhvillimin personal dhe profesional të brezave. Kontributi juaj do të na ndihmojë në vazhdimin e këtij misioni në gjithë trevat shqipfolëse.
Mund të kontribuoni KETU. Falemnderit.
