Dizajni i zyrave ka një ndikim të madh në ndjenjat, produktivitetin e punonjësve, por edhe në marrëdhëniet dhe ndërveprimet e tyre sociale. Klaudia Llupo, arkitekte, shprehet se bizneset shqiptare po i japin rëndësi gjithnjë e më tepër fleksibilitetit dhe përshtatshmërisë në ambientet e punës duke mbështetur mirëqenien e punonjësve përmes teknologjisë dhe elementeve natyrorë. Nga ndriçimi, ngjyrat e deri tek zgjedhja e aksesorëve kreativë duket se dizajni i një zyre tregon shumë për kulturën, vizionin dhe identitetin e kompanisë.
Në këtë intervistë Klaudia flet për trendet dhe konceptet e reja të dizajnit dhe ndikimin e tyre në mbarëvajtjen dhe suksesin e biznesve dhe organizatave.
Cilat mendoni se janë tendencat kryesore në dizajnin e zyrave të bizneseve për vitin 2025?
Tendencat e reja fokusohen tek krijimi i hapësirave dinamike dhe fleksibël, që mbështesin mirëqenien e punonjësve përmes teknologjisë dhe elementeve natyrore. Hapësirat do të jenë të përshtatshme për punë individuale apo bashkëpunuese, me dritare të mëdha dhe bimë të brendshme për një ambient frymëzues. Përparësi do të kenë kushtet optimale për produktivitet, si ajri i pastër, ndriçimi natyral dhe hapësira relaksimi, të mbështetura nga teknologji të avancuara për menaxhimin e klimës dhe ndriçimit.
Si po ndryshon konceptimi i hapësirave të punës në epokën post-pandemike?
Pas pandemisë, hapësirat e punës janë bërë më fleksibël dhe të orientuara te mirëqenia e punonjësve. Ndryshimet kryesore përfshijnë:
Punën hibride: Hapësirat janë dizajnuar për të mbështetur si punën në zyrë, ashtu edhe atë në distancë.
Bashkëpunimin: Hapësira që inkurajojnë interaktivitetin dhe socializimin mes kolegëve.
Mirëqenien: Ergonomia, ndriçimi natyral dhe hapësirat e relaksimit janë thelbësore.
Teknologjinë dhe automatizimin: Sisteme të avancuara për menaxhimin e hapësirës dhe ambientit.
Personalizimin: Mundësia e punonjësve për të krijuar një ambient që përputhet me nevojat e tyre.
Si mund të ndikojë dizajni i zyrave në produktivitetin dhe mirëqenien e stafit?
Dizajni i zyrave ka një ndikim të madh në ndjenjat dhe produktivitetin e punonjësve. Siç përmenda edhe më sipër, fleksibiliteti dhe lidhja me natyrën reduktojnë stresin dhe përmirësojnë fokusin. Ergonomia e mobiljeve garanton komoditet, ndërsa hapësirat për qetësi dhe aktivitete fizike ndihmojnë në ruajtjen e ekuilibrit mendor dhe fizik.
Artikull ekskluziv i Business Magazine Albania.
Ky artikull gëzon të drejtën e autorësisë sipas Ligjit Nr. 35/2016, “Për të drejtat e autorit dhe të drejtat e lidhura me to”.
Artikulli mund të ripublikohet nga mediat e tjera vetëm duke cituar “Business Magazine Albania” shoqëruar me linkun e artikullit origjinal
Që nga viti 2015 nxisim shpirtin sipërmarrës, inovacionin dhe rritjen personale duke ndikuar në zhvillimin e një mjedisi motivues dhe pozitiv tek lexuesit tanë. Kjo punë që e bëjmë me shumë dashuri nuk ka të paguar. Ne jemi platforma e vetme e cila promovon modelin pozitiv të sipërmarrjes së lirë. Përmes kësaj platforme mbështesim edukimin gjatë gjithë jetës si mjet për zhvillimin personal dhe profesional të brezave. Kontributi juaj do të na ndihmojë në vazhdimin e këtij misioni në gjithë trevat shqipfolëse.
Mund të kontribuoni KETU. Falemnderit.
