Në këtë artikull BusinessMag ju sjell disa nga restorantet vegjetariane dhe restorante që ofrojnë mundësi për vegjetarianët. Nëse ju miq të faqes sonë keni sugjerime të tjera restorantesh vegjetariane, të cilat nuk i kemi përfshirë në artikull mund të na i dërgoni me mesazh në faqen tonë të Facebook.
Lexoni: 5 Restorantet më të mira në Tiranë, sipas të rinjve
Veggies Tirana
Restoranti më i famshëm vegjetarian dhe vegan në Tiranë është Veggies. Ky restorant komod që ndodhet në zonën e bllokut është vendi kryesor ku mund të konsumoni ushqime si sallatra ekzotike vegane, quinoa, guacamole, pjatat kuskuse, etj. Është gjithashtu vendi më i mirë në Tiranë për të provuar shije të reja ekzotike dhe vegjetariane.
Për më shumë mund të klikoni në linkun: https://www.facebook.com/veggiestirana/
Gjelbër Resto-Lounge
Restoranti Gjelbër është një ndër të paktët që ofron ushqime vetëm me bazë bimore dhe mjaft të shijshme, të shëndetshme, me çmime të lira si dhe me sa më pak ose aspak ndikim negativ në mjedis.
Për më shumë mund të klikoni në linkun: https://gjelber-resto-lounge.business.site/
Greeny Tirana
Greeny Tirana u hap për herë të parë në Tiranë në Korrik, të vitit 2016. Një nga restorantet e para që shërben ushqim të shëndetshëm dhe të ftohtë. Në Greeny Tirana mund të gjeni ushqim për dashamirësit e mishit, vegjetarianët dhe veganët. Këtu përdoren produkte të freskëta dhe të stinës. Greeny gjithashtu ofron lëngje të ndryshme frutash të freskëta.
Për më shumë mund të klikoni në linkun: https://www.facebook.com/greenytirana/
Oda
Oda është restoranti që ofron të shijoni kuzhinën autentike shqiptare, pranë Pazarit të Ri. Ajo është ndërtuar në vitin 2005 në një vilë të vogël një katëshe, shtëpi tiranase. Specialja e gatimit është pjekja në saç, një pjekje shumë e vjetër tradicionale. Oda preferohet shumë nga turistët e huaj për ushqimin dhe detajet artistiko-historike shqiptare, duke qenë edhe i prezantuar në librin: Guidë Turistike për Ballkanin. Për ju që jeni vegjetarianë Oda ofron ushqime si lakrori dhe pispilia në saç, supën e shtëpisë, patëllxhanët e gatuar me erëza, fërgesën tiranase, qifqinë, tavë me speca të mbushura, fasulet pllaqi, perimet e zgarës, sallatrat e ndryshme, si dhe rakinë e verën shqiptare.
Për më shumë mund të klikoni në linkun: https://www.facebook.com/ODA-Restorant-117551295017643/
Mullixhiu
Pranë liqenit artificial të Tiranës, në një nga zonat më të bukura, ndodhet Mullixhiu, restoranti më i këndshëm në kryeqytetin shqiptar. Mullixhiu është një nga restorantet më të mirë në Tiranë, që ofron ushqime super të shijshme, mikpritje të madhe dhe ngrohtësi familjare që nderon traditën dhe vlerat e kulturës shqiptare. Mullixhiu ju fton të shijoni ushqimet tradicionale shqiptare të risjella në një mënyrë më të sofistikuar dhe moderne, një përzierje e shkëlqyer e të vjetrës me të renë. Përbërësit merren direkt nga Mrizi i Zanave, një fermë e mrekullueshme që ndodhet në Fishtë të Lezhës. Mjafton të provoni lëngun e shegës dhe do të kuptoni që shija nis që aty. Mullixhiu ofron shumë mundësi për vegjetarianët që nga perimet, frutat dhe deri tek ushqimet si byreku apo djathi i prodhuar nga vetë Mrizi i Zanave.
Për më shumë mund të klikoni në linkun: https://www.mullixhiu.al/
Chakra Jonë, Tiranë
Chakra Jonë është i vetmi restorant indian në Tiranë, tek Komuna e Parisit, jo shumë larg nga liqeni artificial. Menuja e larmishme e Chakra ofron një shumëllojshmëri pjatash vegjetariane, të tilla si supa me thjerrëza, lulelakër apo qepë të gatuar me erëza të ndryshme, etj. Gjithashtu, mos harroni të provoni pitet e mrekullueshme tradicionale indiane.
Për më shumë mund të klikoni në linkun: https://www.facebook.com/ChakraJone/
Lexoni: 10 RESTORANTET MË TË MIRA NË EUROPË, MES TYRE DHE NJË NGA SHQIPËRIA E KOSOVA
Happy Belly
Happy Belly është një bar-restorant vegan në zemër të bllokut, afër Sky Tower. Ky bar i vogël ka disa opsione interesante vegane dhe vegjetariane dhe gjithashtu shërben smoothie dhe lëngje të shijshme për këto ditë të nxehta vere.
Për më shumë mund të klikoni në linkun: https://www.facebook.com/Happy-Belly-Eat-Smart-874494982633143/
