Igli Përfundi: “Ja cila është risia që sjell sistemi hidroponik për fermat blegtorale”


Në datat 18-19 Nëntor 2017 në kuadër të javës globale të sipërmarrjes, “Globe Tik & Language Education” organizoi edicionin e dytë të “The steps for creating a successful business”, në Tiranë. Këtij konkursi iu bashkuan shumë të rinj, të cilët ndanë dhe diskutuan idetë e tyre inovatore të biznesit me njëri-tjetrin dhe jurinë. Business Magazine Albania duke qenë gjithmonë mbështetëse e organizimeve të tilla ndoqi këtë aktivitet me shumë interes përgjatë të 2 ditëve. Igli Përfundi ishte fituesi i çmimit të dytë të këtij konkursi, me të cilin zhvilluam një intervistë, për të mësuar më shumë rreth idesë së tij.

BM – Përshëndetje! Së pari a mund të bësh një prezantim të vetes: emër, mbiemër, mosha, arsimi ‎që po ndjek momentalisht.

I – Përshëndetje, unë jam Igli Përfundi, 18 vjeç, studioj në vit të parë për Administrim Biznes në Tirana Business Univerity (TBU) dhe jam pronari i një biznesi tepër inovativ.

BM – Cilët kanë qenë hapat e tu të parë drejt botës së sipërmarrjes dhe a ishte ky biznes, ideja me të cilën u prezantuat në konkursin “The steps for creating a successful business”?

I – Hapat e mia në botën e biznesit i nisa që në gjimnaz, ku bashkë me shokun tim nisëm të krijonim një fermë lepujsh, ku do të mund të prodhonim mish lepuri bio për tregun. Por kjo nuk është ideja me të cilën unë konkurova në konkursin “The steps for creating a successful Business”. Ideja ime në këtë konkurs ishte ndërtimi i një sere hidroponike, ku mund të prodhonim ushqim për kafshët blegtorale. Sistemi hidroponik mundëson prodhimin e barit të njomë në ujë në një kohë rekord (prej 8 ditësh), duke kursyer hapësirë, lodhje dhe sigurisht para.

BM – Na trego më shumë rreth sistemit hidroponik. Çfarë zgjidhje ofron ajo dhe kujt i shërben?

I – Rritja e barit të njomë në ujë është shumë e thjeshtë, praktike dhe efikase mbi të gjitha, pasi bima e merr lëndën ushqyese direkt në rrënjë dhe nuk ka nevojë të mbështetet në tokë. Kjo mënyrë e të marrit ushqim nga bima i jep asaj një kohë të shkurtër për rritjen, e bën më të shëndetshme dhe bën që përdorimi i ujit në të, të jetë më i pakët dhe heq investimet e kushtueshme në sistemet e vaditjes, siç ndodh gjithmonë nëpër serat e zakonshme. Gjithashtu vlerat ushqyese të këtij ushqimi janë shumë të larta. Ky ushqim është i pasur me antioksidantë, vitaminë C, potas, kalcium, magnez, hekur, etj. Këto vlera i merr pasi ushqimi është akoma në fazën e filizit ku ka dhe gjithë vlerat e saj ushqyese më të larta.

/Artikulli u publikua më parë në faqen 32 të numrit 15 të revistës Business Magazine Albania. Ju mund të Shfletoni Këtu nr. 15 të saj.

BM – Si lindi si ide ndërtimi i një sistemi të tillë?

I – Kjo ide lindi nga nevoja jonë për ushqim të cilësisë së lartë dhe pak të kushtueshëm për fermën tonë të vogël të lepujve. Pas ditëve të tëra kërkimesh, sugjerimesh dhe këshillash arritëm në përfundimin për të bërë vetë ushqimin tonë për kafshët dhe ja ku përfunduam tek sera hidroponike.

Sigurisht që ky produkt do t’i ofrohet të gjitha fermave blegtorale (çfarëdolloj kafshe) në Shqipëri, me çmimin më të mirë në treg dhe me vlerat ushqyese më të larta.

BM – Çfarë të nevojitet momentalisht? Mbështetje financiare, këshillues biznesi, tjetër?

I – Momentalisht ne jemi në fazën e shitjeve të vogla dhe “prototipeve”, ku nevoja jonë kryesore është financimi dhe burimet njerëzore. Por me mundësitë e patura kemi arritur të krijojmë lidhje me disa ferma lopësh e dhish, ku kemi fituar besimin e tyre për ta përdorur ushqimin tonë në kafshët e tyre.

Gjithashtu doja të shtoja se të paturit një biznes tëndin dhe të qenurit gjithmonë në lëvizje për mundësi të reja ka qenë një eksperiencë me të vertetë e çmuar për mua, pasi mund të arrish limitet e tua në të gjitha anët. Pa përmendur pastaj adrenalinën e krijuar nga risqet e ndryshme në biznes, që janë me të vërtetë shumë emocionuese.

BM – Faleminderit për intervistën dhe të urojmë shumë suksese!

/Artikulli u publikua më parë në faqen 32 të numrit 15 të revistës Business Magazine Albania. Business Magazine Albania është revista e parë dixhitale me përmbajtje origjinale në shqip të orientuar nga fusha e biznesit. Ju mund të Shfletoni Këtu nr. 15 të saj.

Must watch
Business Mag Nr. #23 - Qershor 2020

Të gjitha planet tuaja për këtë vit, si individë apo sipërmarrës mund të jenë përmbysur. Mbërritja e Coronavirusit në Shqipëri paralizoi gjithçka, ashtu si kudo. Në mënyrë të papritur na vuri në kushte tërësisht të tjera pune, na shtoi pasigurinë e shqetësimin për të ardhmen.

Sipërmarrjet, kryesisht në fushën e IT u përshtatën më shpejt, duke angazhuar punonjësit nga shtëpia. Ato zhvilluan dhe më tej mundësitë për të punuar në distancë, ndërkohë që shumë kompani të tjera u mbyllën plotësisht.

Kjo është një periudhë sprove, për individin, drejtuesit dhe liderin. Kjo është lufta që po zhvillohet në spitale dhe fronti i parë i saj janë mjekë, infermierë e sanitarë. Historia e ekonomisë k a treguar se gjithmonë pas një situatë të vështirë ka një ringritje. Dhe ne besojmë se kështu do të jetë.

Deri atëhërë ajo çka na mbetet të bëjmë është respektimi i rregullave të kërkuara, marrja e përgjegjësive ndaj të tretëve për aq sa mundemi, e të interesohemi për të pamundurit, të ndajmë diçka për ta.

Solidariteti nuk ka munguar e nuk do të na mungojë as kësaj radhe. Ajo çfarë doli në pah krahas solidaritetit ishte varfëria: e shtetit, e kompanive dhe e vetë individëve.

Një ditë pas dërgimit të 30 bluzave të bardha në Itali, The Guardian na vlerësoi në artikullin e saj si zemërgjerë edhe pse Ky numër ishte planifikuar të botohej në Prill 2020, por procesi u shty për shkak të masave të ndërmarra si pasojë e shpërthimit të Covid-19. Edhe pse në kohë vështirësish, jemi …

Shiko më shumë
Na ndiqni në rrjetet sociale