Gerti Boshnjaku: tani kërkohen lehtësi financiare, nesër investime në teknologji


 

Gerti Boshnjaku, Sipërmarrës, themelues i New Media Communications, mbështetës i komunitetit të startup-eve

Me përhapjen e kësaj situate, vlerësoj masat e marra nga qeveria për sigurinë e shëndetin e qytetarëve. Kemi qenë mbështetës për mbylljen dhe ndalimin e punës në zyrat tona për të siguruar kalimin me sa më pak pasoja të krizës duke bërë çfarë është e mundur për të ndalur përhapjen e virusit.

Si kompani teknologjike, ne tek New Media jemi të ndikuar pasi puna jonë me kompanitë shqiptare është pezulluar, ndërkohë që dhe puna që realizojmë për klientë në Itali është minimizuar. Kjo për arsye se Italia është duke përjetuar një krizë akoma më të madhe si vendi më i prekur pas Kinës.

Ne jemi të përgatitur për të punuar nga shtëpia dhe po bëjmë çfarë është e mundur të sigurojmë vazhdimësinë e punës dhe projekteve. Megjithatë nëse situata do të zgjasë për disa javë apo muaj do të jetë shumë e vështirë të mbajmë kompanitë aktive në kapacitet 100% dhe do ta kemi të vështirë pagesën e taksave / tatimeve / sigurimeve etj.

Jemi para 2 sfidash, ndër të cilat njëra është përballja me situatën aktuale dhe tjetra për të qenë të përgatitur më mirë në emergjenca të ardhshme.

Më e rëndësishmja tani është sfida aktuale, përballja me situatën. Ne si kompani do të bëjmë të pamundurën për të mbajur stafet në marrëdhënie pune, por duke parë se në gjithë botën do të ketë ngrirje të transaksioneve kërkojmë që qeveria të na suportoje duke:

Pezulluar detyrimet që nga momenti i shpalljes së situatës emergjente me 8 Mars. Detyrimet janë Tatim-Fitimi (që këkohet parapagim), tatim burim, pagesat e sigurimeve shoqërore dhe shëndetësore si edhe taksat / tatimet bashkiake e vendore.

Të mos aplikohen gjobat dhe kamatvonesat për këto detyrime dhe për detyrimet e Energjisë dhe UKT apo shërbimeve të tjera publike.

Ndërkohë për sfidën e dytë, parapërgatitja për t’u përballur me ngërçe të tilla shëndetësore dhe ekonomike sugjerojmë që të investohet fuqishëm në ngritjen e një infrastukture të shërbimeve digjitale.

Vume re se në një krizë të tillë ishin pikërisht shërbimet online që po mundësojnë vazhdimësinë e funksionimit të jetesës afër normales.

Edukimi po kthehet online, por duket se jemi shumë larg me aksesin në internet në zonat jashtë qendrave si Tirana, Durrës etj.

E-commerce po triumfon si zgjidhje kyçe për situatën pasi do të furnizojë individët me produktet / shërbimet jetesore. Pamë se me pak përpjekje kompanitë mund të adaptohen me këtë transformim për të ndërtuar një prezencë dixhitale, pasi do t’i përshtaten kërkesës së tregut dhe mjedisit aktual, por mungesa e madhe është realizimi i transaksioneve pa përdorimin e Cash-it. Përdorimi i parasë cash është përcjellës i virusit dhe një kosto e madhe për ekonominë dhe në vazhdimësi.

Këtu është një ngërç i madh që duhet zgjidhur pasi ekonomia e internetit ka nevojë që të largohet nga përdorimi i parasë fizike dhe të kalojë pa vonesë tek paraja dixhitale. Nuk jam jurist për të vlerësuar hapat konkrete, por e shoh si nevojë jetike për të ardhmen e afërt të ekonomisë këtë hap.

Gjithashtu, e rëndësishme është të jemi pjesë e një tregu global pune dhe shembuli i Estonisë është një shembull për t’u ndjekur në këtë drejtim.

Të jemi optimist dhe të kërkojmë përballimin e sfidës së të tashmes, por të shohim dhe tek zgjidhjet e nevojshme të pas-krizës me investime të fuqishme tek infrastruktura digjitale, tek nxitja e inovacionit tek të rinjtë dhe promovimi i sipërmarrjes. E ardhmja kërkon zgjidhje të reja nga njerëz të rinj dhe me mendesi të re!

Must watch
Business Mag Nr. #24 - Tetor 2020

Numri 24 i revistës Businessmag.al sjell një panoramë të zhvillimeve, përshtatjeve dhe ecurisë në sektorë të ndryshëm të ekonomisë. Në të njëjtën kohë, shohim zhvillime relativisht të kënaqshme.  Organizime të reja si Dhoma Ekonomike e Gruas, duket si një shpresë për më shumë zë, lobim dhe mbështetje për gratë sipërmarrëse dhe sipërmarrjet e reja.

Gjatë kësaj periudhe angazhime si programi “Ringrihu më i fortë”, ishin një lloj kundërpërgjigje ndaj dëmeve ekonomike që po shkakton pandemia.

Influencerat vijojnë të rrisin hapësirat e tyre dhe janë bërë një instrument i rëndësishëm marketimi. Në brendësi të revistës do të gjeni renditjen e top 100 influencerave më të mëdhenj në vend.

Gjatë kësaj vere ndërkohë, vetë Businessmag pati një fushatë të suksesshme të promovimit të turizmit shqiptar. Qindra të rinj u angazhuan të dërgojnë foto dhe përshkrimet e vendeve të ndryshme të Shqipërisë.

Shiko më shumë
Na ndiqni në rrjetet sociale