Në kuadër të programit kombëtar të inteligjencës artificiale të quajtur “AI Leap 2025,” Estonia planifikon të ofrojë akses falas në aplikacionet kryesore të AI për të gjithë nxënësit e shkollave të mesme dhe mësuesit e tyre. Iniciativa do të nisë me shpërndarjen e ChatGPT Edu për 20,000 nxënës të klasave 10-11 dhe 3,000 mësues të tyre, duke filluar nga 1 shtatori.
Zbatimi i programit do të menaxhohet nga Fondacioni AI Leap, i cili do të krijohet këtë pranverë si një bashkëpunim midis qeverisë estoneze dhe sektorit privat. Trajnimi për mësuesit do të zhvillohet në vjeshtë, ndërsa po zhvillohen negociata me OpenAI dhe Anthropic për të integruar aplikacionet e tyre të AI në sistemin arsimor të Estonisë, me plane për të shtuar edhe mjete të tjera në të ardhmen.
Programi AI Leap 2025 bazohet në iniciativën historike “Tiger Leap” të Estonisë, e cila solli kompjuterin dhe internetin në të gjitha shkollat e vendit 30 vite më parë, shpjegoi Presidenti Alar Karis në një njoftim për shtyp. “Ashtu si programi Tiger Leap nisi zhvillimin e e-Estonia, për të cilën njihemi ndërkombëtarisht edhe sot, ne po hapim një kapitull të ri në zhvillimin e sistemit tonë arsimor dhe shoqërisë sonë digjitale,” theksoi ai. “Inteligjenca artificiale ka ndryshuar përgjithmonë botën dhe, ashtu si të gjitha sektorët, edhe sistemi arsimor duhet t’i përshtatet këtyre ndryshimeve. Duke integruar teknologjinë më të mirë të disponueshme në arsim dhe duke e bërë mësimin më të zgjuar dhe të personalizuar, do të ndihmojmë Estoninë të bëhet kombi më i zgjuar në botë. Në këtë mënyrë, AI Leap do të ndihmojë që zgjidhjet inteligjente të shtrihen në të gjitha sektorët dhe të rrisin aftësinë ndërkombëtare të estonezëve dhe ekonomisë estoneze.”
Lexo edhe:Sa kushton ChatGPT? Gjithçka që duhet të dini për planet e çmimeve të OpenAI
Pas fazës fillestare të shtatorit, programi do të zgjerohet edhe në shkollat profesionale dhe për nxënësit e rinj të klasave të 10-ta në vitin pasues, duke përfshirë 38,000 nxënës dhe 2,000 mësues të tjerë.
“Konkurrueshmëria ekonomike e Estonisë varet nga sa mirë mund t’i përgatisim të rinjtë për epokën e inteligjencës artificiale,” deklaroi Ministrja e Arsimit dhe Kërkimit, Kristina Kallas. “Në mënyrë që AI të mbështesë jo vetëm të mësuarit, por edhe rritjen tonë ekonomike, do të investojmë fuqishëm në trajnimin e mësuesve si pjesë e AI Leap. Mësuesit e përgatitur mirë do të jenë në gjendje të zbatojnë aftësitë e AI në mënyrë inteligjente në shkolla.”
“Në tregun e punës së ardhshëm, avantazhin nuk do ta kenë ata që përdorin më shumë AI, por ata që e përdorin atë më zgjuar,” shtoi Linnar Viik, bashkëthemelues i AI Leap dhe një nga arkitektët kryesorë të programit Tiger Leap. “Sistemi arsimor nuk mund të injorojë apo ndalojë teknologjitë e reja. Përkundrazi, shkollat duhet të udhëheqin zbatimin e teknologjisë duke ofruar një kornizë mbështetëse.”
Që nga viti 2015 nxisim shpirtin sipërmarrës, inovacionin dhe rritjen personale duke ndikuar në zhvillimin e një mjedisi motivues dhe pozitiv tek lexuesit tanë. Kjo punë që e bëjmë me shumë dashuri nuk ka të paguar. Ne jemi platforma e vetme e cila promovon modelin pozitiv të sipërmarrjes së lirë. Përmes kësaj platforme mbështesim edukimin gjatë gjithë jetës si mjet për zhvillimin personal dhe profesional të brezave. Kontributi juaj do të na ndihmojë në vazhdimin e këtij misioni në gjithë trevat shqipfolëse.
Mund të kontribuoni KETU. Falemnderit.
