Në një ditë të plotë trajnimi u fol për shumë ide, strategji biznesi dhe mendime frymëzuese nga eksperienca mbi 40-vjeçare e Brian Tracy dhe djalit të tij Michael Tracy në fushën e zhvillimit personal dhe të biznesit. Ide të tilla mendimi të bëjnë të reflektosh dhe ne shpresojmë të jenë me vlerë edhe për ju.
Ja disa mesazhe që u përçuan gjatë prezantimit, të cilat duam t’i ndajmë me ju.
- Syno të bëhesh versioni më i mirë i vetes tënde.
Imagjino veten tënde pas 10 vitesh në versionin tënd më të mirë, më të realizuar dhe të suksesshëm. Imagjino sikur ta takoje e të bisedoje me të. Çfarë mendon se do të të këshillonte? Mendon se do të të sugjeronte të bëje të njëjtat gjëra? Apo të veprosh me më shumë guxim për gjërat që dëshiron e të luftosh për ëndrrat e tua?
Kur ne fillojmë të veprojmë me guxim, të ndjekim ëndrrat dhe të mos kemi më frikë nga mendimi i të tjerëve, fillojmë të ndihemi më të lirë e të fortë brenda vetes. Me këtë ndjesi, vendos të bëhesh versioni më i mirë i vetes tënde.
/Artikulli u publikua më parë në faqen 6 të numrit 18 të revistës Business Magazine Albania. Ju mund të Shfletoni Këtu
- Jeta fillon të bëhet më e mirë, vetëm kur ne bëhemi më të mirë.
Nëse ne nuk synojmë të përmirësohemi e të ndryshojmë vazhdimisht, me kalimin e kohës do hasim pengesa e vështirësi që do të na detyrojnë të ndryshojmë objektivat tona. Do t’i ulim e zvogëlojmë ato, në nivelin tonë të botëkuptimit dhe aftësive. E me kalimin e kohës, do krijohet një rreth vicioz nga i cili është vështirë të dalim: Duke zvogëluar objektivat, zvogëlojmë edhe intensitetin e dëshirës për t’i arritur ato, e më pas nuk përpiqemi të kërkojmë më zgjedhje të reja, të ndryshojmë e të përmirësohemi. Liria jonë është në raport të drejtëpërdrejtë me zgjedhjet e mundësitë që ne i ofrojmë vetes.
- Nuk mjafton vetëm zhvillimi i inteligjencës (IQ). Duhet të zhvillojmë edhe inteligjencën emocionale për ta kthyer vizionin në realitet.
Është e habitshme, por thuhet se mbi 80% e limiteve tona, janë limite që ne ia vendosim vetes. Vetëm 20% janë limite për arsye të jashtme. Edhe pse shumica e njerëzve e dinë se çfarë duan, kanë vizion të qartë nga ana intelektuale, përsëri nuk e realizojnë. Sepse të realizosh çdo gjë me vlerë, duhet forcë karakteri, vullnet e disiplinë. Intensiteti i dëshirës, përkushtimit, qëndrueshmërisë dhe forca për të qenë optimist edhe pas çdo vështirësie, janë cilësitë kryesore që bëjnë diferencën. Ato i japin jetë ideve dhe i bëjnë realitet.
Businessmag ka përgatitur gjithashtu një intervistë me Michael Tracy, gjatë trajnimit të zhvilluar në Milano. Ndiqni intervistën:
- Si mendojnë njerëzit që arrijnë performancë të lartë.
Ata mendojnë shumicën e kohës rreth: Asaj që duan të arrijnë dhe për mënyrat se si t’i realizojnë ato. Ndryshe nga ata, performuesit e dobët, mendojnë e bëjnë gjëra të tjera që nuk kanë lidhje me objektivat kryesore, si për shëmbull: flasin për gjërat që i shqetësojnë e ankohen për to, harxhojnë kohën me aktivitete që nuk sjellin vlerë për rritjen e performancës. Ata ndihen të pa fuqishëm, sepse harxhojnë energjitë dhe kohën e tyre rreth gjërave ose ngjarjeve që nuk i kanë në dorë për t’i ndryshuar.
- Çdo gjë që duam/duhet të bëjmë, meriton ta nisim, edhe pse jemi dobët në hapat e parë.
Duhet të kuptojmë se nuk e arrijmë dot suksesin duke ndejtur në zonën tonë të rehatisë. Ji mendjehapur të mësosh e provosh eksperienca të reja. Mëso, bëhu i mirë në atë fushë, e më pas mëso edhe të tjerët duke u bërë mentor i tyre në fushën tënde të ekspertizës. Imagjino sikur të kesh 100 mentorë rreth vetes, të fushave që të interesojnë, të flisnin për gjërat që ata dinë më mirë. Të gjithë ne do të mësonim më shpejt e më mirë, nëse do të mësonim së bashku.
- Gjej mentorë që mund të të ndihmojnë të arrish atë që dëshiron.
Jeta nuk është një sport individual, por një lojë skuadre. Duhet të krijojmë një skuadër e rrjet njohjesh për të mësuar nga të tjerët, për t’u fuqizuar më shumë, për të shtuar më shumë vlerë e për të rritur mundësitë për të fituar. Vetëm, edhe lojtari më i mirë, (mendo Cristiano Ronaldon ose Lionel Messin) nuk mund të fitojë dot, edhe nëse luan kundër skuadrës së lagjes time (dhe skuadrës tënde :).
- Marrëdhënia jonë me të tjerët përcakton lumturinë tonë.
Ato gjëra që janë më të rëndësishme për lumturinë tonë, nuk janë materiale. Asnjë nga ne nuk do të mendojë në ditën e fundit të jetës, se sa të bukur e ka shtëpinë, makinën apo celularin. Lumturia vjen nga marrëdhëniet e mira me njerëzit. Cilësia e marrëdhënies me familjen, me miqtë dhe me kolegët, kanë impakt të drejtpërdrejtë në lumturinë dhe mirëqenien tonë.
Konkluzione
Duke krijuar më shumë mundësi për veten, ne bëhemi më të lirë. Ndaj, duhet t’u japim më shumë rëndësi zgjedhjeve që bëjmë çdo ditë. Duhet të kërkojmë sfida edhe më të mëdha e të veprojmë me guxim, sepse jeta fillon të bëhet më e mirë vetëm kur ne bëhemi më të mirë.
Dhe së fundi, ashtu si idetë, edhe lumturia jonë personale merr më shumë kuptim kur ne e shprehim dhe e ndajmë me të tjerët. Duhet ta shprehim jo vetëm sepse ajo është ngjitëse, por edhe sepse nuk ka dhuratë që mund të bësh, më të bukur se ajo.
/Artikulli u publikua më parë në faqen 6 të numrit 18 të revistës Business Magazine Albania. Business Magazine Albania është revista e parë dixhitale me përmbajtje origjinale në shqip të orientuar nga fusha e biznesit. Ju mund të Shfletoni Këtu nr. 18 të saj.
Që nga viti 2015 nxisim shpirtin sipërmarrës, inovacionin dhe rritjen personale duke ndikuar në zhvillimin e një mjedisi motivues dhe pozitiv tek lexuesit tanë. Kjo punë që e bëjmë me shumë dashuri nuk ka të paguar. Ne jemi platforma e vetme e cila promovon modelin pozitiv të sipërmarrjes së lirë. Përmes kësaj platforme mbështesim edukimin gjatë gjithë jetës si mjet për zhvillimin personal dhe profesional të brezave. Kontributi juaj do të na ndihmojë në vazhdimin e këtij misioni në gjithë trevat shqipfolëse.
Mund të kontribuoni KETU. Falemnderit.
