Dështo shpejt, mëso shpejt dhe inovo

Trajnerja suedeze Asa Jarskog, jep disa mesazhe për ndjekësit e Businessmag.al

A e dini se sipërmarrës e politikanë shqiptarë mentorohen nga trajnerë të Kofi Annan e Nelson Mandelës?!

Prej 25 vitesh trajnerja suedeze Asa Jarskog punon si konsulente në fushën e menaxhimit dhe trajnere në lidership. Konsulente e figurave ndërkombëtare në më shumë se 50 vende në Europën Veriore, Europën Lindore dhe Juglindore, Amerikën Latine, Azi, Ballkan dhe Afrikë, Asa zbulon për Businessmag.al se ka asistuar e mbështet edhe figura të njohura në Shqipëri.

“E dua punën time. Kam takuar dhe kam punuar me liderë e persona të famshëm si Nelson Mandela, Koffi Anan dhe kam pasur kënaqësinë të trajnoj një numër drejtuesish në Shqipëri. Kam mësuar nga të gjithë personat që kam trajnuar në karrierën time,” thotë Asa në një intervistë për Businessmag.al

/Artikulli u publikua më parë në faqen 22 të numrit 19 të revistës Business Magazine Albania. Ju mund të Shfletoni Këtu nr. 19 të saj.

Në Shqipëri një prej personave që na zbulon se ka asistuar është Alban Zusi, sipërmarrës prej vitesh dhe ish zëvendësministër i Bujqësisë për disa vite të tjera.

Por, çfarë mendon Asa për inovacionin në një kompani, në një shoqëri?

“Ajo çfarë kam hasur nga përvoja ime e punës, është që në vend të personave inovativë duhen liderë që i lejojnë njerëzit të jenë inovativë. Ndaj unë propozoj tre ide.”

Së pari, ne nuk mund të krijojmë organizata të strukturuara me hierarki, rregulla e përshkrime pune. Është një modë e vjetër e ndërtimit të një organizate/kompanie. Rruga e duhur e drejtimit është përmes lidershipit të bazuar në vlera. Ne mund të nisemi në këtë mënyrë që në organizime të vogla si ato familjare deri tek kompanitë, thotë Asa.

Ajo e ka aplikuar këtë në familjen e saj. Ajo dhe bashkëshorti, zgjodhën të mos i japin asnjë rregull fëmijës së tyre. Ajo thotë se sot, “vajza jonë është një prej fëmijëve më të përgjegjshëm që kam njohur, pasi i është dashur të zgjedhë çfarë është e drejtë dhe çfarë jo. E kemi bërë përmes vlerave.”

E njëjta gjë vlen për kompaninë. Nëse komunikoni vlera, njerëzit ju ndjekin pasi frymëzohen nga ju dhe jo sepse kanë frikë nga ju.

Së dyti, nëse doni që njerëzit të jenë inovativë ju duhet t’i lejoni ata të bëjnë gabime. “Nëse nuk bëjmë gabime, nuk mësojmë, nuk inovojmë. Një pjesë e mirë e inovacionit ka ardhur nga gabimet. Penicilina është bërë gabimisht. Si lider duhet po ashtu të bëjmë gabime,” thotë Asa. Ajo kujton se, nuk mund t’u thuash punonjësve: “ju bëni gabime, por unë do të jem perfekt”. Rregulli është: dështo shpejt, mëso shpejt dhe inovo”.

Ndërkohë, ne duhet të krijojmë besim në kompani. Nëse nuk ka besim, njerëzit nuk do të bëjnë gabime. “Ajo çfarë kam vënë re në Shqipëri, është se niveli i besimit është relativisht i ulët, ndryshe nga shumë vende të tjera ku është shumë i lartë. Flas për besimin në shoqëri, në njerëz, në organizata dhe mbi të gjitha besimin në vetvete”, thotë Asa.

Së treti, nuk mund të zgjidhim problemet e reja, me zgjedhje të vjetra.

“Ne nuk mund të vazhdojmë të shkarkojmë formate të vjetra për të lexuar me to informacionet e reja. Nëse nuk bëjmë dot të kundërtën, të paktën të ndalojmë së marri informacion të vjetër. Të ndalojmë. Të gjejmë hapësira e të mos rrimë të lidhur me të vjetrën”. Këto kanale mund t’i hapim me metoda si meditimi.

Asa e njeh Tiranën e Shqipërinë prej 5 vitesh. Gjenerata e re, sipas saj, dëshiron të bëjë ndryshime të mëdha këtu. “Natyra juaj është mahnitëse. Të rinjtë duhet të rrëzojnë strukturat e vjetra të mendimit. Të rinjtë duhet të ndryshojnë perspektiven,”s thotë ajo.

Asa ishte një nga folëset kryesore në Festivalin e Inovacionit që u zhvillua në Shtator në Tiranë.

/Artikulli u publikua më parë në faqen 22 të numrit 19 të revistës Business Magazine Albania. Business Magazine Albania është revista e parë dixhitale me përmbajtje origjinale në shqip të orientuar nga fusha e biznesit. Ju mund të Shfletoni Këtu nr. 19 të saj.