Deficiti i skemës së pensioneve rrezikon buxhetin. Guvernatori Sejko: “Vendosni tavan për kontratat PPP” - Business Magazine Albania

Deficiti i skemës së pensioneve rrezikon buxhetin. Guvernatori Sejko: “Vendosni tavan për kontratat PPP”

Thellimi i deficitit të skemës së pensioneve po vë në vështirësi buxhetin e shtetit, që po rrit gjithnjë e më shumë financimet për këtë zë teksa numri i kontribuuesve vazhdon të ulet.

Është ky shqetësimi që Banka e Shqipërisë ngriti në opinionin e saj për projketbuxhetin 2022, ku bëri apel për rishikim të vazhdueshëm të skemës, ku sipas raportit të Kontrollit të Lartë të Shtetit numri mesatar i kontribuesve për sigurimet shoqërore rezultoi në 642.4 mijë në vitin 2020, duke u ulur me mbi 17.7 mijë në raport me 2019-ën.

Edhe KLSH në raportin e saj ka vërejtur se fondi rezervë nuk është menaxhuar me eficiencë nga Instituti i Sigurimeve shoqërore.

“Skemat e sigurimeve shoqërore dhe shëndetësore vijojnë të përbëjnë një barrë të ndjeshme për financat e shtetit. Në këtë kontekst, duke pasur parasysh dhe trendet e pafavorshme demografike, Banka e Shqipërisë sugjeron rishikimin periodik të skemës së pensioneve, atë të sigurimeve shëndetësore dhe skemat e tjera të sigurimeve sociale, me synim ruajtjen e këtyre skemave në trajektore të qëndrueshme dhe të përballueshme për buxhetin e shtetit.”

Lexo edhe: Guvernatori Sejko gjatë mbledhjes së Këshillit Mbikëqyrës të BSH: Pritet që vala aktuale e rritjes së çmimeve të jetë kalimtare

Ndër të tjera, guvernatori Sejko i kërkoi qeverisë vendosjen e vlerave tavan afatgjatë për kontratat koncesionare si dhe forcim të kontrollit ndaj tyre.

“Banka e Shqipërisë sugjeron përfshirjen e tavaneve ligjore afatgjata mbi vlerën e përgjithshme të kontraktuar të PPP-ve. Ky rregullim do të ishte një element plotësues i kontrollit të nivelit të rrezikut potencial që PPP-të mund të kenë mbi shëndetin e financave publike. integrimin e procesit të kontraktimit dhe përzgjedhjes së PPP-ve me programin strategjik të investimeve përmirësimin e vazhdueshëm të kapaciteteve profesionale të njësive që administrojnë vlerësimin, kontraktimin dhe monitorimin e këtyre projekteve.”  – u shpreh guvernatori.

Teksa e ka cilësuar realist projektbuxhetin 2022, guvernatori i bankës qendrore Gent Sejko përsëriti thirrjen për shpërndarje më të mirë kohore të shpenzimeve buxhetore, e jo duke i përqendruar ato vetëm në tremujorin e katërt, siç Financat bëjnë zakonisht përmes akteve normative.

Që nga viti 2015 nxisim shpirtin sipërmarrës, inovacionin dhe rritjen personale duke ndikuar në zhvillimin e një mjedisi motivues dhe pozitiv tek lexuesit tanë. Kjo punë që e bëjmë me shumë dashuri nuk ka të paguar. Ne jemi platforma e vetme e cila promovon modelin pozitiv të sipërmarrjes së lirë. Përmes kësaj platforme mbështesim edukimin gjatë gjithë jetës si mjet për zhvillimin personal dhe profesional të brezave. Kontributi juaj do të na ndihmojë në vazhdimin e këtij misioni në gjithë trevat shqipfolëse.

Mund të kontribuoni KETU. Falemnderit.

Must watch
Business Mag Nr. #30 - Nëntor 2022
Shiko më shumë
Na ndiqni në rrjetet sociale
0