Si frymon komunikimi marketing brenda organigramave?
Përditësuar së fundmi: 06/11/2015

Si frymon komunikimi marketing brenda organigramave?

Share
nga Klodiana Kola
Nën 06, 2015
Klodiana Kola është një profesioniste e komunikimit marketing me një eksperiencë mbi 10 vjet në këtë sektor. Ekspertiza
lexo me teper >

Ata që e kanë krijuar përvojën e tyre të punës, duke kryer një kapërcim të natyrshëm nga Agjencia Publicitare drejt një kompanie, si staf i departamentit të marketingut dhe komunikimit, pa dyshim që e kanë ndjerë ndryshimin e sfidave dhe filozofinë e punës në njërin krah dhe në tjetrin.

Agjencia është si një familje solide (edhe pse e vogël ndonjëherë) që lufton drejt një qëllimi unik: përmbushja e kërkesave të klientit brenda buxhetit dhe me performancë maksimale në aspektin kreativ. Kur jeton në Agjenci ndjen adrenalinën e konceptimit të ideve dhe kur më në fund lançimi bëhet me sukses merr frymë thellë dhe ndjen përmbushje. Në të kundërt, nëse dështon, pezmatimi është kolosal. Në një farë mënyre Agjencia përfaqëson bërthamën filozofike të Advertising, ku konceptet bazë janë të qarta (askush nuk duhet të merret me to) dhe synohet perfeksioni estetik në komunikimin komercial. Organigrama në vetvete ndoshta është më shumë një projeksion virtual sesa një ndarje reale, rigoroze dhe skematike….. dhe e mërzitshme e planeve të punës.

Si frymon komunikimi marketing brenda organigramave?

Por çfarë ndodh në një kompani, në një biznes lokal që ndoshta operon prej mëse 10 vitesh në treg? Jo pa qëllim i referohem termit “kompani” pasi korporatat nuk janë objekt i vëmendjes time në këtë shkrim. Po të lexosh strukturat organizative të këtyre tip biznesesh në dukje janë tepër të elaboruara, të përpikta me grafikë e skema që nuk mungojnë as në raportet vjetore, as në faqet e webit dhe as në dokumentacionin e brendshëm. Ndjesia e parë që të krijohet është një vlerësim për vëmendjen që i është kushtuar strukturimit të biznesit.

Diku aty në atë strukturë është edhe Departamenti i Marketingut, herë me një Manaxher të vetëm që bën zotin dhe shkopin bashkë, herë me 3-4 veta që mbase do t’u duhen nja 2 vjet nga dita e krijimit të departamentit për ta ndarë shapin nga sheqeri dhe për ta kuptuar më në fund se “kush bën çfarë? (një përfundim sa ironik aq edhe dramatik).

Ka dhe nga ato raste ku departamenti në “kohë paqeje” mund të ketë në përbërje 2 veta, por në raste krizash (fushatash) bëhet me 8 ose 9 veta, pasi duhen ide … sa më shumë ide… që të hidhen në një raport rutinë, i cili më pas do t’i paraqitet Administratorit.

Rastet që më bëjnë të mendoj se ky profesion nuk rresht së të habituri edhe pse në Shqipëri të bën ta urresh jo pak përkrah pasionit që ndien për të, janë pikërisht ato kur një pjesë e madhe e detyrave të departamentit të marketingut “kanë fluturuar tek departamenti i burimeve njerëzore”, sepse dikush ka vlerësuar që ka gjëra më serioze dhe të rëndësishme për të bërë … siç janë trajnimet, produkti, apo shitjet.

Që nga ky moment ndërtimi dhe mirëmbajtja e brandit, kreativiteti dhe konceptimi i strukturave solide në komunikim, kalojnë në planin 0! Stafet frustrohen, kolegët delegojnë pafundësisht tek njëri-tjetri, produktiviteti bie dhe amullia rritet.

Vetëkuptohet që duhen parashikuar buxhete suplementare në planin e biznesit që më në fund komunikimi marketing të frymojë siç duhet brenda organigramave të biznesit lokal. Ky duhet të konsiderohet një investim i zgjuar dhe jo një humbje kohe. Periudhat e gjata të krizave nuk favorizojnë, po ashtu edhe filozofia e paepur e disa drejtuesve që duan me çdo kusht t’i mbajnë nën një çadër edhe shitjet edhe trajnimet edhe produktin edhe marketingun, me struktura të tkurrura, të vjetëruara që më shumë prodhojnë mediokritet sesa profesionalizëm!

  • Shitjet duhet të ndahen përfundimisht nga komunikimi marketing, ato vetëm sa kanibalizojnë njëra-tjetrën brenda një departamenti të vetëm.
  • Strukturat e superpozuara ku dy ose më shumë departamente i mbivendosen njërin-tjetrit rrisin kostot, ulin produktivitetin dhe dëmtojnë imazhin e kompanisë në afat të gjatë kohor.