Aeroporti i Vlorës “mbërrin’’ në Kuvend  


Një ditë pas vendimit të qeverisë, projektligji i Aeroportit të Vlorës mbërrin në Kuvend. Procedura e përshpejtuar për t’i hapur rrugë investimit, u paralajmërua që kur kryeministri Rama lancoi gjetjen e investitorit dhe nisjen e punimeve për ndërtim në qershor të këtij viti.

Në relacionin që shoqëron projektligjin, qeveria shqiptare argumenton nevojën e një aeroporti të dytë, duke theksuar fluksin e rritjes së udhëtarëve, krahasuar edhe me rajonin.Sipas projektligjit, grupit turk i jepen të drejta nga projektimi deri tek menaxhimi i aeroportit.

“Me anë të këtij projektligji synohet që të miratohet një procedurë e veçantë, për negociimin dhe lidhjen e kontratës, ndërmjet shtetit shqiptar dhe shoqërive “Cengiz Construction & Kalyon & Kolin Construction”, me objekt projektimin, ndërtimin, operimin, mirëmbajtjen dhe menaxhimin e aeroportit të qytetit të Vlorës.

Dokumentat e prezantuar në Kuvend prekin edhe çështjen e shumëpërfolur të tarifave të larta të fluturimit, duke theksuar se aeroporti i Vlorës do të ofrojë tarifa më të ulëta. “Nga një shqyrtim paraprak i propozimit të shoqërive konstatohet se tarifat që propozohen të aplikohen në këtë aeroport do të jenë më të lira se ato që aplikohen nga TIA (Aeroporti i Tiranës)”, thuhet në relacion. Struktura e saktë e kësaj tarife do të përcaktohet në përputhje me studimet dhe diskutimet e mëtejshme me qeverinë shqiptare.

Aeroporti i Vlorës është planifikuar të ndërtohet rreth 20 kilometra larg qytetit, në zonën e Akernisë. Investimi do të realizohet nga kompanie turke Cengiz Construction, për një vlerë rreth 100 milionë euro. Menaxhimi do t’i takojë firmës, ndërsa qeveria pritet të garantojë pjesën tjetër të funksionimit, përsa i përket fluturimeve dhe veprimeve të mëtejshme. Kontrata do jetë sipas formulës së partneritetit publik privat.

Ekonomistët thesojnë se, aeroporti i Vlorës mund t’i japë një dinamikë pozitive sektorit të turizmit dhe rritjes së cilësisë së shërbimit, ndërsa ekonomistë të tjerë, kanë theksuar se një formë më efektivë për financat publike dhe zhvillimit të tregut të fluturimeve do të ishte hapja e aeroportit të Kukësit.

Must watch
Business Mag Nr. #24 - Tetor 2020

Numri 24 i revistës Businessmag.al sjell një panoramë të zhvillimeve, përshtatjeve dhe ecurisë në sektorë të ndryshëm të ekonomisë. Në të njëjtën kohë, shohim zhvillime relativisht të kënaqshme.  Organizime të reja si Dhoma Ekonomike e Gruas, duket si një shpresë për më shumë zë, lobim dhe mbështetje për gratë sipërmarrëse dhe sipërmarrjet e reja.

Gjatë kësaj periudhe angazhime si programi “Ringrihu më i fortë”, ishin një lloj kundërpërgjigje ndaj dëmeve ekonomike që po shkakton pandemia.

Influencerat vijojnë të rrisin hapësirat e tyre dhe janë bërë një instrument i rëndësishëm marketimi. Në brendësi të revistës do të gjeni renditjen e top 100 influencerave më të mëdhenj në vend.

Gjatë kësaj vere ndërkohë, vetë Businessmag pati një fushatë të suksesshme të promovimit të turizmit shqiptar. Qindra të rinj u angazhuan të dërgojnë foto dhe përshkrimet e vendeve të ndryshme të Shqipërisë.

Shiko më shumë
Na ndiqni në rrjetet sociale