Agroineko, prek katër vende: Shqipëri, Greqi, Qipro dhe Bullgari dhe nënkupton nxitjen e Ekosistemit të Inovacionit Ndërrajonal Balkan Med për Maturimin dhe Integrimin e Ideve Sipërmarrëse Inovatore në Sektorin Agroushqimor.
Dhoma e Tregtisë dhe Industrisë Tiranë bashkë me partnerët nga Greqia, Qipro dhe Bullgaria po organizojnë në Tiranë, takimin e 2-të të partnerëve.
Christos Tzomakas, drejtues i projektit për rajonin, tha për Businessmag se, “Ky projekt është pjesë e programit BalcanMed, dhe synon maturimin e ideve në sektorin agro-ushqimor, duke ndihmuar sipërmarrësit e rinj potencialë të fitojnë disa aftësi bazike, duke i ndihmuar ata të ndërtojnë një plan biznesi dhe t’ua prezantojnë investitorëve potencialë, për të realizuar një sipërmarrje. Mund të jenë ide inovative në prodhim, paketim, marketing, etj”.
Aktorët e përfshirë janë sektori publik, kërkimik përmes universiteteve dhe biznesi përmes dhomave të tregtisë.
Kozeta Sevrani, pedagoge në Fakultetin Ekonomik të Universitetit të Tiranës, tregon se univesiteti do trë kontribuojë në pjesën e inovacionit, përmes hartimit të paketave mbi të cilat do të modelohet inkubimi i bizneseve të ardhshme. “Ne shkojmë deri tek modeli i një inkubatori, pra do të ofrojmë një modul për trajnimet”.
Mes dhjetëra të rinjve që pritet të përfitojnë nga ky projekt, mund të jenë edhe studentë të ekonomikut, të cilët tashmë kanë zhvilluar disa detyra kursi në këtë drejtim.
Projekti, i financuar nga fondet IPA të Bashkimit Europian, me partner kryesor Fondin e Zhvillimit Rajonal për Rajonin e Greqisë Perëndimore synon të sigurojë mbështetjen e duhur për SME-të e sektorit Agro-Ushqimor në rajonet e Ballkanit Mesdhetar.
Që nga viti 2015 nxisim shpirtin sipërmarrës, inovacionin dhe rritjen personale duke ndikuar në zhvillimin e një mjedisi motivues dhe pozitiv tek lexuesit tanë. Kjo punë që e bëjmë me shumë dashuri nuk ka të paguar. Ne jemi platforma e vetme e cila promovon modelin pozitiv të sipërmarrjes së lirë. Përmes kësaj platforme mbështesim edukimin gjatë gjithë jetës si mjet për zhvillimin personal dhe profesional të brezave. Kontributi juaj do të na ndihmojë në vazhdimin e këtij misioni në gjithë trevat shqipfolëse.
Mund të kontribuoni KETU. Falemnderit.
