Pse në Londër u vendos një GJOKS GJIGAND në tarracën e një ndërtese?

Në qoftë se do të kishit qenë në Ditën e Nënës në Mbretërinë e Bashkuar dhe do të bënit një ecje rreth zonës Shoreditch të Londrës, ju do të kishit parë një gjoks gjigand të vendosur në majë të një ndërtese.

Gjoksi nuk ishte i vendosur atje për të shkaktuar shok apo frikë. Ai ishte vendosur aty për të vënë theksin në një çështje shumë delikate.

“Është e vështirë të besohet se në vitin 2017, nënat e Mbretërisë së Bashkuar ende ndihen të gjykuara kur ushqejnë fëmijët e tyre në publik, me shishe apo me gji,” thotë një blog post nga Mother London.

Një pjesë e iniciativës së Mother London, ku agjencia përpiqet të zgjidhë një problem ose të nxjerrë në pah një çështje ku ai ndihet i apasionuar, përfshin përpjekjen e ekipit krijues për të ndihmuar gratë që mund të ndihen në siklet ose të gjykohen duke ushqyer foshnjat e tyre në publik.

Projekti është “një festë e drejtë e çdo gruaje për të vendosur se si dhe ku ato do të ushqejnë fëmijët e tyre, pa u ndjerë në faj apo të zëna ngushtë në lidhje me zgjedhjet e tyre prindërore,” thotë posti i agjencisë.

Diçka mjaft e natyrshme siç është të ushqyerit e fëmijëve (nëpërmjet gjirit ose ndryshe) të kthehet në një pikë stresi për gratë në vitin 2017 duket diçka absurde. Pse duhet t’i interesojë dikujt mënyra se si një grua është duke ushqyer fëmijën e saj? Por presionet shoqërore janë shumë reale dhe është e vështirë të injorosh shikimet apo komentet e njerëzve. Ndoshta një gjoks në mes të Londrës mund t’i shtyjë njerëzit në një bisedë në lidhje me të ushqyerit me gji në publik.

/Artikulli u publikua më parë në faqen 44 të numrit 13 të revistës Business Magazine Albania. Business Magazine Albania është revista e parë dixhitale me përmbajtje origjinale në shqip të orientuar nga fusha e biznesit. Ju mund të Shfletoni Këtu nr. 13 të saj.